Hkristan kahkyin gumdin lam a matu akyu hpyi ai bat hpe hpungdim dat ai lamang hpe San Pawlu a myit malai lu ai poi hta, Wa Sarabyin Leo gaw, Hkristan ni yawng hpe Kabu Gara Shiga hkaw tsun na matu, sasana magam bungli hpe matut galaw sa wa na matu saw shaga dat ai.
Ndai nawku daw jau lamang hpe Roma mare na San Pawlu Nawku Htingnu kaba hta galaw ai lam chye lu ai. Hkristan Kahkyin gumdin lam a matu akyu hpyi ai bat hpe shaning shagu January shata praw 18 ya kaw nna 25 ya shani du hkra galaw nga ai.
Wa Sarabyin Leo gaw, Hkristan nawku htung ni shai hkat tim, makam masham langai sha re ai hpe ahkyak shatai nna, mungkan ting de Kabu Gara Shiga hpe shachyam shabra ai sasana magam hpe rau jawm galaw sa wa na matu, 2026 ning January shata 25 ya, Laban shani, Hkristan Kahkyin gumdin lam a matu akyu hpyi ai bat hpung dim dat lamang hta, n-gun jaw lai wa ai.
Wa Sarabyin ndai shaning shagu galaw ai lamang gaw, Hkristan ni hpe Kabu Gara Shiga hkaw tsun na sasana magam bungli hta ap nawng da ai lam hpe shadum ya ai lam hpe madi madun dan ai, “anhte a lapran na garan ginhka ai lam ni gaw – Hkristu a nhtoi hpe n pat shingdang ai sha –mungkan hpe nhtoi htoi tu shangun ra ai hpe myit dum ga” “Anhte gaw langai sha re! Anhte gaw langai sha rai nga sai! Dai hpe chye na, hkam sha nna mu lu hkra galaw ga!” shi a mungga hta tsun da nga ai.
Hkristan Nawku hpung shagu na dat kasa ni sa du shanglawm lai wa ma ai .
