Daini na Ja Chyum Mungga hpe hti sumru yu ai shaloi e, Nli gat ai wa a ga shadawn hte Ga shadawn ni a yaw shada ai lam na la lu ga ai. Madu Yesu gaw, masha hpan shagu chye madat lu na matu, shia a tara mungga ni hpe ga shadawn ni hte tsun sharin ya nu ai. Daini na Chyum mungga hta e mung, Karai Kasang a mungdan lam hpe Nli gat ai wa a ga shadawn hte hkaw tsun dan nga ai.  Ndai ga shadawn a lachyum gaw, Karai Kasang gaw sumsing mungdan a nli tum hpe jut shara shagu hta e gat hkai bang dat nu ai. Shingrai hkap la lu ai a tsam hta hkan nna, a kyu hkam sha lu ai lam ni mung shai mat nga ai.

Tsun mayu ai gaw, Karai Kasang a kasha Yesu hku nna, sumsing mungdan hte seng ai lam, kabu gara shiga hpe hkaw tsun ai a marang e, madat hkam la ai ni yawng a myit kraw kata de du shang mat wa ai rai nga ai. Raitim mung na la ai ni yawng hta n kau mi gaw, manu n shadan ai. Bai n kau mi rai yang n lu hkap la ai ni mung lawm nga ai. Bai n kau mi hkap la ai raitim, kaga tinggyeng a myit ru tsam pu lam ni a majaw, akyu n hkam sha lu ma ai. Kaga n kau mi gaw, Madu Yesu a hkaw tsun ai mungga ni a majaw, myit masin galai mat nna, masha ningnan prat ningnan rai, rawt jat galai shai mat ai. Tinang a matu hte makau grupyin a matu hkik hkam mai kaja ai lam ni hpe ap nawng daw jau lu nna, ngwi pyaw ai wu hpung (sh) pyaw ngawn ai simsing mungdan hpe gaw gap sa lu ma ai.