Htai Ya Ai Wa –         Wa Jau Dr.Joseph Gawlu Yung Wa

GA SAN  1     Anhte Kahtawlik Nawku Hpung hta, kaga nawku hpung ni zawn, Mungga hpe laksan hkaw tsun ai, Yesu a Mying hpe gang nna nat ni hpe gawt shapraw ai lam ni n mai galaw ai nga nna na ga ai.  Hpa majaw i?

GASAN 2       Kaga hpung ni hkaw tsun ai Mungga ni line ntsa hkan na kalang marang madat ga ai.  Madat nna myit galai mat na chyawm gaw n re.  Nawku hpung hpe jahpoi ai ni hpe chyawm gaw n madat ai sha, n- gun lu ai mungga ni hpe madat ai ma jaw.  Mai madat n mai madat, shut n shut chye mayu ga ai.

HTAI –            Yoseph Sau Yaw e, Madu Yesu a Nawku Hpung gaw, nnan hpang wa ai kaw nna Karai kasang a Kabu Gara ai Shigga hpe hkaw tsun, mauhpa lamik kumla ni hpe shapraw dan let hpang wa ai rai nga ai.  Shi a prat ban mi a hpang ban mi rai nna, Chyoi Pra ai Wenyi e woi len ai hpe hkam la nna galu kaba wa saga ai.

Daini na aten hta raitim, Anhte a Amyusha ga ni hku nna, Saradaw, Jau ni, Brother, Mama ni, Tara Hkaw Sara ni mungga hpe san san alak mi rai nna hkaw tsun dingyang rai nga ma ai.  Ga shadawn, RVA – Jinghpaw, Lisu, Rawang; Kayin – Myen ga ni hku nna hkaw tsun nga ma ai.  Wa Sarabyin a Vatican Rung kaw nna mung shani shagu hkaw tsun nga ai.

Raitim, Sau Yaw san ai hpe ngai chye madat la ai hku rai yang gaw – anhte hta shawa hpawng ni mahkawng la nna Mungga hkaw tsun ai, mauhpa lamik kumla ni galaw ai zawn re ai (Charismatic) akyu hpyi sharin hpawng ni, concert zawn re ai ni hpe ngu mayu nhten.  Dai hpe gaw, Saradaw, Jau ni sha n rai, hpung masha ni nan lu galaw ai, galaw ra ai sasana magam bungli ni rai nga ai.  Dai zawn lu galaw na matu – chyum mungga hpe man man hti, sharin hkam la, hka ja la nna, akyu hpyi ai hta shakut ra ai.  Chyoi Pra ai Wenyi e woi len ai, shi a nsen hpe madat shaman ra ai.

Kaga hkristan hpung law law mung on line ntsa e hkaw tsun nga ma ai.  Grai sanglang ai hku, myit lawm na zawn nga hkra Karai a mungga hpe hpyan dan ma ai.  Madat la mai nga ai, hka ja la ra ga ai.  Raitim, anhte Kahtawlik Nawku Hpung masha ni hku nna chye da ra ai lam gaw –

1. Kahtawlik Nawku Hpung a makam masha hpe ru pawt (3) kaw na lu la ai; dai gaw Chyum Laika, Makam masha Ji Wa ni a sharin shaga ai (traditions), the Nawku Hpung a sharin shaga na ahkaw ahkang ni rai nga ai.  
2. Dai majaw, Nawku Hpung hta doctrine the dogma ngu ai lahkawng nga ai.  Doctrine ngu ai gaw chyum Laika hta ka da sharin ya ai hpe dantawk hkap la kam sham ai lam; dogma ngu ai gaw, chyum laika hta dantawk n tsun da tim, Nawku Hpung hku nna “kam ra ai lam ni” ngu nna sharin ya ai lam ni mung nga nga ai. 
3. Protestan hpung ni gaw, lahta e tsun da ai ru pawt (3) hpe n la ai sha, chyum laika hta rawng ai hpe chyu sha hkap la lachyum htai sharin ai majaw, Nawku Hpung sharin shaga ai lam ni the shai ai lam ni nga ai.  Nawku Hpung hpe adawt ai zawn rai na re.

Dai majaw, anhte mung Nawku Hpung a sharin shaga ai lam ni hpe atsawm sha chye tawn da ra ga ai.

San ai wa – Lashu Saradaw Sasana, Nam Tun Urawng, Bung Mun mare e shanu nga ai Luk sing Yosep SauYaw