Daini na Ja Chyum Mungga hpe hti sumru yu ai shaloi e, Gat hkai da ai nli shi chyu shi tu kaba wa ai ga shadawn a lam hte Chyinghkrang tum ga shadawn a lam ni hpe na hti lu ga ai. Madu Yesu gaw kabu gara shiga hkaw tsun ai hte sumsing mungdan a nli tum hpe shinggyim masha ni a masin salum hta gat hkai bang dat nga ai. Anhte a asan re ai myi hte dai nli tum a akyu chyeju kumla ni hpe mu lu ai atsam n nga nga ai. Shi a mau hpa galai shai mat wa ai lam ni gaw shi chyu shi byin pru wa ai rai nga ai. Dai mabyin lam ni gaw sumsing mungdan a galu kaba wa ai lam mabyin ni hte bung taw nga ai.

Dai zawn galu kaba wa ai mabyin ni gaw, Karai Kasang a galaw sa ai lam nan re. Karai Kasang a mungdan hte seng ai kabu gara shiga hkaw tsun ai. Sasana chyam bra wa na matu galaw sa ai hta awng dang lam n lu ai raitim myit n daw ai. Moi sasana majen je ai ni yak hkak ai shara ni hta sasana magam gun hpai ai shaloi lang ta awng dang ai lam n lu ai raitim, shaning grai na ai hpang e gaw sasana grai rawt jat wa ai hpe anhte Myanmar mung hkristan sasana labau kaw chye la lu ai rai nga ai. Shingrai ya daini hkristan hpung masha ni, Jau mama tara hkaw sara ni law wa ai gaw, moi sasana magam gun ai ni shakut da ai apu asi ni rai nga ai. Dai majaw sasana matut rawt jat na matu, anhte a shaga la ai prat hte maren tinggyeng hkum nan myit mada, kam sham, tsawra myit masin hte jawm shakut sa ga law.