Readings: 1st: Zep 2:3; 3, 12-13; 2nd: I Cor 1:26-31; Gos: Mt 5:1-12
Ndai mali ngu na Laban shani hta, Karai Kasang gaw shagrit shanem ai gaw ahkyak ai lam hpe nawku hpung gaw shadum ya nga ai. Karai kasang gaw anhte hpang de sit sa nna, shi hpang de shinggyin la nna shaman chyeju jaw ai. Shi gaw myit nem ai ni hpe yu nna, shi a hpaji byeng-ya, mai kaja ai lam, Hkristu a chyoi pra ai lam ni hte jahpring ya nga ai. Dai majaw Karai Kasang hta sha shagrit shanem ai ni hte dinghpring ai ni gaw kabu gara nga ma ai.
Zehpani laika hta, Karai Kasang gaw Israela a matu ngam nga ai ni hpe makawp maga na ngu ga sadi jaw da ai. Raitim, ndai ga sadi hta mau hpa langai gaw, shagrit shanem ai hte grit nem taw ai masha ni sha lawm nga ai. Karai Kasang gaw nawku hpung hku nna, Shi hpe kam hpa ai, shagrit shanem ai masha ni hta lawm na matu anhte hpe saw shaga da nga ai. Shi gaw anhte hpe dinghpring ai, teng man ai, shagrit shanem ai, Karai Kasang a ga madat mara ai ni hta lawm na matu saw shaga nga ai. Karai Kasang anhte hpe saw shaga da ai ndai arawng lu ai hkring sa aten a matu shakut ra ga ai. Ndai lam gaw, ja gumhpraw, mying gumhkawng ai, daru magam aya hpe myit ai majaw re. Tinang hkum hpe n hkalem ai sha, Yesu Hkristu a shinggyim masha hte asak hkrung lam kaw nna htoi tu pru wa ai prat tup na manu dan ai lam ni hpe matut hkan sa ga ai.
Daw lahkawng hta, Karai Kasang gaw shagrit shanem ai myit masin hpe kabu gara nga ai lam Pawlu shadum ya nga ai. Lachyen lahka ai lam n nga tim, wenyi hta grit nem ai ni hte matsan mayan re ai ni hpe law law lang lata la nga ai. Dai majaw, shinggyim masha ni a hpaji byeng-ya, n-gun atsam, arung arai sutgan n law ai ni hte hpawng de da ai Hkristan hpung kaya kahpa n hkrum na matu Pawlu n-gun jaw nga ai. Anhte a buga hpung law malawng gaw mungkan a matsan mayan masha ni hte hpawng de da ai. Ndai lam gaw Hkristu Yesu hta dan dawng wa ai Karai Kasang a myit ra ai lam rai nna, ngam ai hpaw shadan dan ai lam ni hta sakse hkam da nga ai.
Dai majaw, mungkan a shingra tara hku nna hpaji n chye tim, ngam nga ai ni hta lawm na matu Karai Kasang anhte hpe shaga la ai lam hpe Pawlu shadum ya nga ai. Shi a masing hpe shadik shatup na matu, Anhte hpaji chye ai, sut su ai majaw shi anhte hpe lata la ai n rai. De a malai, anhte a grit nem ai myit masin a majaw lata la ai re. Dai hku nna Karai Kasang gaw anhte a hpaji byeng-ya, mai kaja ai lam, chyoi pra ai lam tai wa sai. Dai ni gaw shi a amyu masha ni hta teng sha ra sharawng ai atsam ningja ni rai nga ai. Dai ni hpe lu ai ni yawng gaw shaman chyeju hkam la lu ma ai.
Dai ni na kabu gara shiga gaw bum ntsa e hkaw tsun ai mungga kaw na rai nga ai. Hkristu gaw shawng daw 1 hta Karai Kasang shi a matu lata la na ngu ga sadi jaw da ai ndai ngam nga ai ni hta lawm lu na matu karum ya lu ai ahkyak dik htum Hkristan sak hkrung lam ni hpe bai tsun shadum ya nga ai. Ndai lam hpe myit sumru yu yang, wenyi hta matsan mayan hkrum ai ni, ngu ai gaw, tsin-yam tsindam hkrum ai ni, yawn hkyen hkrum ai ni, tara rap ra lam a matu kawsi hpang gara ai ni, simsa lam a matu shakut ai ni, matsan dum chye ai ni, myit san seng ai ni, jahpoi asawng hkrum ai ni, zingri zingrat hkrum ai ni gaw, Karai Kasang hte grau ni htep wa shangun ai prat hpe sak hkrung nga ai hpe mu lu na re.
Shanhte gaw aten shagu na san pra ai masha ni hta anhte mu lu ai hkrung nga ai shaman chyeju ni rai nga ai. San Pra ai Francis gaw matsan mayan lam hpe lata la ai, San Pra ai Ignatius gaw madat mara ai lam hta hkawm sa ai, San Pra ai Augustine gaw Karai Kasang a tsawra myit hpe grau ra sharawng ai, San Pra ai Thomas Aquinas gaw Karai Kasang a hpaji byeng-ya hpe hkap la ai, Avila mare na San Pra ai Theresa gaw akyu hpyi ai hta shi hkum shi hka ja la ai. Ndai ni hte kaga san pra ai ni gaw Hkristu langai sha a hkrang bung sumla ni rai nga ai. Shaman chyeju hkam la lu ma ai. Daini nawku hpung gaw anhte mung shakut shaja yang shanhte hta lawm lu na hpe shadum ya nga ai. Daini shanhte gaw Karai Kasang a htani htana mungdan hta ning ngai nga lu ai hkum tsup ai hpung masha ni rai nga ma ai. Shanhte gaw anhte hte rau shang lawm na matu akyu hpyi let ala nga ma ai. “Wenyi hta matsan mayan hkrum ai ni gaw, Karai Kasang a Mungdan gaw shanhte a matu rai nga ai majaw, teng sha a lu ma ai.”