Daini gaw San Pra ai Blaise a poi nhtoi rai nga ai. Blaise a mying hpe hkam la da ai ni yawng hpe Happy Feastday rai u ga.
Du machyi ai ni makawp maga ya ai San Pra ai masha re. Dai re ai majaw daini na Missa Hkungga hta Jau ni gaw Hpung masha ni yawng hpe Hpayawng deng hpe Udang kumla galaw la nna du hpe laksan shaman ya ai rai nga ai.
Daini na Madu a Kabu gara shiga gaw Marku laika 5:21-43 hta na rai nga ai.
Daini na Kabu gara shiga hta mabyin lahkawng hpe mu lu nga ai.
- Jairus ngu ai wa a kasha hpe Yesu Jahkrung sharawt la ai.
- 12 ning tup sai hkaw ana hkam sha nga ai Num kasha Yesu a Palawng ahtawk hkra let shi a machyi nga ai ana mai tsai wa ai lam na la lu ai re.
Ndai mabyin ni gaw Yesu a Lamik Kumla ni re.
Ndai mabyin ni a marang e anhte hpe shadum ya nga ai lam gaw. Faith and Action kamsham ai sha n ram ai tatut magam bungli lawm ra ai lam sharin ya nga ai.
Yesu lamik kumla madun dan ai law law re nga ai. Daini na kabu gara shiga a laklai ai lam gaw machyi ai masha ni madaw Yesu hpang de sit sa shakut ai re. Jairus shi a kasha a matu Yesu hpang de sit sa ai. 12 ning tup sai htaw ana hkam sha nga ai num kasha Unawng Uwa a lapran hta shakut let Yesu a Palawng hpe hkra lu hkra shakut nga ai. Yesu tsi ya lu ai hpe kam ai. Kam ai ngu madang hta sha n jahkring kau ai sha dai kam ai myit hpe tatut galaw ai lam hpe mu lu ai.
Tsawra ai Nu Wa ni anhte a makam masham mung sak hkrung ai makam rai ra nga ga ai re. Tatut hta dai makam hpe hkrang shapraw na ahkyak nga ai re. Dai makam hpe tatut hkrang shapraw wa ai aten hta Obstacles ngu ai pat shingdang ai lam ni, hkrit gaya ai lam ni, n dang nyet ra ai lam ni law law nga na re. Dai lam ni hpe tawt lai lu hkra shakut ra ga ai. Machyi nga ai num kasha shi hta pat shing dang da ai lam ni law law nga ai raitim n hkrit n gaya ai sha shakut ai majaw mai tsai lu sai re. Jet ai Makam masham sha rawng nga u.
Karai Kasang a mau hpa lamik kumla ni anhte a prat hta hkam sha lu na re. Jet ai makam masham shawng n gawgap nna lamik kumla chyu tam nga yang gaw lachyum n rawng ai kaman li la sha rai mat na re. Ya prat lamik kumla chyu tam let makam masham lam dam nga ai ni law law rai nga ai re.
Kasa Petru “Madu e anhte a makam hpe Jat ya rit” ngu hpyi ai. Yesu hpe shi Mungkan a sut gan ni, arawng aya ni mai hpyi nga ai. Raitim n hpyi nga ai. Makam masham jat ya na matu sha hpyi nga ai. Hpa majaw ta? Makam gaw grai ahkyak ai majaw re. Petru dai makam masham jat wa na matu hpyi ai zawn anhte mung tinang a makam ngang kang wa hkra shakut hkawm sa ga.