Daini hti ang ai Kabu gara shiga gaw Marku 6:7-13 hta na rai nga ai.
Daini gaw San pra ai Agatha a poi nhtoi mung rai nga ai. Mying hkam la da ai ni yawng hpe Happy Feastday ngu nna shakram dat ai.
Madu Yesu gaw shi a sape ni hpe lahkawng hkawng di nna kabu gara shiga hkaw tsun na matu dat ai lam rai nga ai. Dat ai ten hkrun lam a matu muk, nhpye, ja gumhpraw arung arai n lang shangun ai. Raitim nat tsadan hpe hkyawt na ahkaw ahkang jaw dat ai re. Dum nta hkan shang nna tinang hpe hkap la ai nta rai yang “ndai nta hta ngwi pyaw ai gaw nga nga u ga” ngu nna shakram shangun nga ai. Nhkap la ai rai yang “tinang a lagaw na nhpu pyi ahpu kau shangun nga ai.
Daini Kabu gara shiga hku nna shadum ya nga ai lam hta Mission Sasana ngu ai gaw tinggyeng magam bungli n re. Community ngu ai masha uhpung uhpawng hte galaw ra ai magam bungli re. Shada da garum shingtau hkat na matu, pawn ba hkat na matu re.
Sasana magam bungli galaw wa ai ten hta yak hkak ai lam law law nga ga ai. Tinang hpe hkap la ai, ra sharawng ai ni nga ai zawn tinang hpe ninghkap ai ni mung law law nga ga ai. Dai aten myit daw ai lam n nga ai sha tinang galaw ra ai sasana magam bungli hpe kangka ai hte galaw nga na ahkyak nga ai re.
Tinang hpe n hkap la ai lam gaw hkrat sum lam n rai nga ai. Anhte a shingdu hta Madu Karai Kasang galoi mung anhte hte rau rai nga ai lam hpe myit dum na ahkyak nga ai. Yak hkak jamjau ai lapran hta Karai Kasang hpe kangka sadi dung nga na gaw ahkyak nga ai re.
Kasa ni Madu Yesu jaw ai ahkang aya hte maren myit malai lu na matu hkaw tsun ai, machyi ai masha ni hpe shamai shatsai ya lu ai, nat hkyawt ai magam ni hpe galaw lu ma ai. Kasa ni lu ai ahkaw ahkang gaw madat mara ai, kangka sadi dung ai hte, kam sham ai a majaw shanhte dai zawn re ai mau hpa amu hpe galaw lu ma ai re.
Anhte mung kasa ni zawn Karai Kasang a ntsa kangka sadi dung ai hte kam sham myit rawng nga yang anhte a shani shagu na galaw sa wa ai magam bungli hta mau hpa akyu ni hkam la lu na re.