Daini hti ang ai Madu a kabu gara shiga gaw Marku a laika 7:1-13 hta na rai nga ai.

Kabu gara shiga hta Madu Yesu a sape nkau mi htung tara n hkan ai, lata hpe n kashin ai, ntsa lam jasan jaseng ai lam hpe n galaw ai majaw Hparishe ni Madu Yesu hte shi a Kasa ni hpe tsun jahpoi ai lam na la lu ga ai. Madu Yesu mung kasa ni hpe bai tsun ai gaw “Isaia gaw nanhte hpyi hpun ai ni a lam hpe hkrak rai myihtoi ga tsun da ai: “Ndai amyu gaw ngai hpe nten hte hkungga lara di ma ai; raitimung, shanhte a myit masin gaw ngai hte tsan gang nga ai; shinggyim masha ni a tara matsun ni hpe mahtang Karai Kasang a hkang da ai ga hpe zawn sharin shaga ma ai: shanhte ngai hpe nawku ai amu kaman lila rai nga ai” ngu tsun wu ai.

Hkungga tsawra ai shiga madat nga ai Nu, Wa Hpu Nau ni e

Daini na kabu gara shiga a marang e anhte a shani shagu na sak hkrung hkawm sa hkrun lam hta Karai Kasang gaw ntsa lam hpe ra sharawng ai n rai, myit masin kraw lawang kata kaw na galaw ai hpe ra sharawng ai rai nga ai.

Anhte tinang a hkumhkrang hpe ntsa lam grai chye shatsawm jahtap chye ga ai. Dai zawn myit masin hta mung tsawm htap wa hkra shakut ra ga ai.

Anhte hkan nga ai nawku hpung a tara ni gaw Karai Kasang hte grau ni htep wa ra ai re. Kalang lang anhte a prat hta nawku hpung htung tara ni hkan let Karai Kasang hte grau tsan wa chye ga ai. Kaning re ten ni ta? Masha ni a man hta akyu hpyi dan ai, mai kaja ai lam hpe ntsa lam galaw dan masu ai. Dai zawn re ai lam ni anhte hta byin chye ga ai. Dai zawn re ai lam ni byin wa ai ten tinang hkum dinglik chye na ahkyak nga ga ai. Tinang a ntsa lam hpe pyi n malap hkra shatsawm jahtap chye ai tinang a myit masin hpe mung tsawm htap hkra galaw lu hkra shakut hkawm sa wa ga.