Daini hti ang ai Madu a kabu gara shiga gaw Marku a laika 7:14-23 re.
Daini gaw Lourdes Mare hta Chyoi ai Nu Maria dan pru dan ai poi ninghtoi rai nga ai.
“Masha langai hta shi a shinggan kaw na shang wa ai hpa mung, shi hpe awu asin n di kau lu ai; shi a kata kaw na pru wa ai baw ni mahtang, shi hpe awu asin ndi kau lu ai. Dai nhkru nkaja ai baw ni yawng gaw, kraw kata kaw na pru wa ai hte, masha hpe awu asin di kau lu ai”
Hkungga tsawra ai Nu, Wa, Hpu Nau ni daini na kabu gara shiga hta Yesu shi hpang hkan nang ai shawa masha ni hpe sharin shaga ai lam hta n hkru n kaja ai lam gaw shinggan na n rai, masha a kraw kata na pru wa ai lam ni she nhkru nkaja ai lam ni hpe byin shangun ai re hpe shadum nga ai. Nse nsa ai amu ni, lagu lagan ai, masha sat ai, num shaw ai, manawn ai, Karai Kasang hpe jahpoi ai, gumrawng ai ndai lam ni mahkra gaw masha a kraw lawang kata na pru wa ai lam rai nga ai.
Daini na kabu gara shiga kaw na anhte hpe shadum ya nga ai lam gaw ntsa lam sharai na hta kata lam na anhte a myit masa lam ni sharai lajang let hkawm sa ra ai lam shadum ya nga ai. Shani shagu anhte a myit hpe san jep yu nna n kaja ai lam ni hpe koi yen let shakut hkawm sa wa ga.