Daini na hti ang ai Madu a Kabu gara shiga gaw Marku 8:1-10 hta na rai nga ai.
Daini gaw San pra ai Cyril hte San pra ai Methodius yen a poi nhtoi rai nga ai. Happy Feastday rai u ga ngu shakram dat nngai.
Kabu gara shiga hta Madu Yesu Masha hkying mali hpe Lusha shalaw nna jaw sha ai lam hpe na la lu ga ai.
Daini na kabu gara shiga hpe dinglik yu yang lam masum hpe mu lu nga ai. (1) chyeju dum ai (2) Muk hpe ahkyep alep di ai (3) daw jaw ai lam ni rai nga ai. Dai zawn sha Missa Hkungga hta muk hpe la nna chyeju dum shakawn let ahkyep alep di nhtawm jaw sha nga ai.
Hkristan ni a sak prat madung mung dai zawn re rai nga ai. Chyeju dum ai, tinang a sak prat hpe sak jaw ap nawng ai hte daw jau ai magam bungli ni rai nga ga ai.
Anhte hpe hpan da ai Karai Kasang gaw Wenyi a malu masha sha n ga hkum hkrang a matu mung galoi mung nhpaw nya jaw ya nga ai Karai Kasang rai nga ai.