Daini na akyu hpyi lamang hta: Strength in Joy (Kabu Gara ai a N-gun Atsam)
ngu ai ga baw hpe jawm sumru yu ga.
Hpunau ni e, Mungkan pinra hta Kabu gara ai ngu ai gaw hkoi mat, wai mat nna, anhte hpe hkalem ai zawn rai nga ai. Mungkan e jaw ai kabu gara lam hta grau kaba ai, Ngang grin ai kabu gara ai hpe gara hku lu la na ngu ai hpe Karai a chyum mungga hta na jawm hkaja la ga.
Nehemia 8:10 hta myihtoi wa gaw myit yawn let, kaya let hkrap nga ai shawa masha ni hpe:
“Wa manu, sau ai hpe sha mu; dwi ai hpe lu mu; n lu ai ni hpe gam jaw mu: daini gaw, Madu a chyoi pra ai shani rai nga ai: myit hkum kaji myit Karai Kasang hta kabu gara nga ai gaw, nanhte a n-gun atsam rai nga ai” ngu nna tsun ai.
Hpa majaw nga yang, Israela masha ni gaw, shanhte a hten za mat sai nawku htingnu hpe nnan sha naw gaw gap la lu ma ai. Shaloi, Tara Laika sara wa Ezra gaw shawa masha ni a man e Karai Kasang a mungga hpe hti dan ai; shaloi shawa masha ni gaw, Karai Kasang a ga hpe shanhte n madat n mara kau sai majaw yawn ai, kaya ai hte ga de gum dagup let hkrap ma ai. Dai majaw, myihtoi Nehemia shanhte hpe n-gun jaw ai rai nga ai.
Karai Kasang gaw anhte a kabu gara ai hpe shi a Mungga hpe madat nna, shi a hpang e hkan nang ai hta npawt gaw da na hpe ra sharawng nga ai. Dai gaw shi hpe kabu gara shangun ai; shi a kabu gara ai gaw anhte a matu n-gun atsam rai nga ai.
Bai, Shakawn Kungdawn 16:8-11 hta tsun da ai gaw, Mungkan ga na n-gun atsam ngu ai gaw, sumsing lamu na anhte a Kawa Karai hta shamyet shanat nga ai kaw na pru wa ai kabu gara lam rai nga ai ngu ai hpe madi madun da ai; madat yu ga-
“Nye a man e ngai Karai Kasang hpe tut tut tawn da na nngai. Nye a hkra maga e shi anga nga ai majaw, ngai n shamu na nngai. Dai majaw nye a myit masin kabu nga ai hte nye a arawng awng nga li ai. Nye a hkum shan mung asan apra sha nga lu li ai.
Kaning rai nme law, nang nye a myit masin hpe katsan ga de kau da ya na ndai n rai. Na a chyoi pra ai wa hten bya hkrum na nang hkraw nga ndai n rai.
Asak de woi sa ai lam nang ngai hpe madun nit dai; Na a man e, hpring tsup ai kabu gara lam nga nga ai; na a hkra maga e ngamu ngamai ai gaw htani htana rai nga ai”.
Dai majaw, ndai dinghta ga ntsa e jet ai, kaba dik hte ngang grin ai kabu gara lam hpe Karai Kasang myit ra ai lam ni hpe hkan shatup ai ni chyu sha lu la mai nga ai. Dai kabu gara ai gaw galoi mung n wai n mat ai, anhte hpe mauhpa n-gun atsam mung jaw ya ai.
Ga Shagawp17:22 hta “Kabu gara ai myit hkam kaja ai tsi rai nga ai; Gawng run ai chyawm gaw, nrut nra ni hpe jahkraw kau nga ai” nga nna tsun da ai.
Asim sha myit sumru akyu hpyi ga
Roma 14:17 hta,
“Karai Kasang a mungdan gaw, sha sha, lu lu rai na hku n re ai sha, Chyoi Pra ai Wenyi e, dinghpring ai, ngwi pyaw ai hte kabu gara ai, rai nga ai” nga nna Kasa Pawlu tsun ai.
Bai, Ga Shagawp 17:22 hta,
“Kabu gara ai myit hkam kaja ai tsi rai nga ai; Gawng run ai chyawm gaw, nrut nra ni hpe jahkraw kau nga ai” nga nna tsun da ai hpe mung bai myit dum ga.
Dai majaw, Shakawn Kungdawn 28:7 hte akyu hpyi ga,
“Karai Kasang gaw nye a n-gun hte n-gang rai nga ai, Shi hta nye a myit shingbyi nga nna ngai karum ai hkrum ni ai. Dai majaw nye a myit awng nga nna, mahkawn mangoi hte ngai shi hpe chyeju jaw na nngai.”
Hpang jahtum hku nna, Kolose 1:11 hta na “Shi a hpung shingkang re ai n-gun nga ai hte maren, shakut sharang nna kabu gara nga ai hte myit galu kaba hkum tsup hkra, n-gun lagaw amyu myu hte shaja ya ai hkrum myit ga” ngu nna n-gun jaw dat nngai law.
Yawng hpe Wa Karai shaman y anna n-gun lagaw jat ya u ga!