Sumpra Bum, Durip Jau Ginwang De Wa Saradaw John Mung La Sam Sa Du Kawan Ai Hpung Masha Ni A Hkam Sha Lam

ginwang up Jau kawn nawku jawng chyinghka lam kaw Wudang hte hkap tau ai

Slg. Petru Matsaw Tu ( Buga masha ) ;

Sumpra Bum Mare ngu ai gaw anhte wunpawng myusha ni a manu dan ai ginra langai mung rai nga ai. Ndai Sumpra Bum gaw Myitkyina, Putao kagat ai lam maw kaba makau kaw nga ai rai nna, Hka Panglai tsaw madang ( 1600 ) nga ai mare rai nga ai.

Anhte Sumpra Bum gaw moi shawng de grai pyaw pyaw rai nga lai wa ai, raitim mung daini Mungdan a mabyin a majaw, n ru n ra re ai lam ni nga ai majaw hkawm wa, hkawm sa lam ni yak ai, yi galaw timung yu li hku bai du ai majaw buga masha ni jam jau jam hkau hkrum ai ahkying aten rai nga ga ai.

Ndai zawn jam jau jam hkau hkrum nga ai aten hta anhte a chyeju madu Sagurem wa, Wa Saradaw John Mung Ngawn La Sam hpung kawan sa du hkrum zup ai majaw daini anhte myit hta n chye tsun, n dang tsun hkru kabu ai. Wa Saradaw sa du hkrum zup ai majaw anhte nawku hpung masha ni sha n rai, Sumpra Bum buga masha yawng myit ngwi myit pyaw simsa ai shaman chyeju hpe hkam la lu na re hpe myit masin hta hkam sha lu ai. Wa Saradaw sa du kawan ai a marang e anhte Sumpra Bum, Durip jau ginwang hta makam masham mung grau nna ngang kang rawt jat dam lada ai nawku hpung langai mung byin tai wa na rai sai ngu ai hpe mung kam ai, magam bungli galaw sa ai lam ni hta mung grau nna myit rawt let matut nna ra ai lam mahkra hpe tinang dangdi dang dep ai hte maren galaw shakut shaja na myit masin hpe mung daini lu la sai ngu grai kabu let hkam sha lam tsun dan mayu ai.

Hkam sha lam tsun shapraw dan ai Slg. Petru Hkawawm Matsaw Tu

Sara Joseph Htingraw La Tawng ( Lit hkam Tara Hkaw Sara );

Daini na zawn anhte Sumpra Bum, Durip jau ginwang kata hta Karai Kasang a chyeju hte gaw gap la lu sai Sagu Rem Kaja Mung Bawng Htingnu hpe ngut kre la nna dingshawn poi galaw na hkyen lajang ai hta Sagurem wa, Wa Saradaw John Mung Ngawn La Sam sa du ai majaw anhte yawng grai kabu ga ai. Wa Saradaw hte rau Wa Jau ni, Mama ni, Brother ni sa du nna anhte hpe ninggun jaw ai, anhte hte rau hkrum shaga lu ai majaw nawku hpung masha kaji kaba yawng grai kabu nga ga ai, ndang tsun hkra chyeju dum ga ai. Daini gaw Karai Kasang a chyeju hpe laklai ai hku hkam la ga ai ngu hkam sha lu ai hte Karai Kasang hpe chyeju dum shakawn ga ai.

Hkam sha lam tsun shapraw dan ai lit hkam Sara Joseph Htingraw La Tawng

Myitkyina Saradaw Sasana Sagu Rem wa, Wa Saradaw John Mung Ngawn La Sam hte Wa Jau ni a Hka Hku Mung, Uma Bum Ga de hpung kawan hkawm sa ai hkrun lam hta Sumpra Bum, Durip jau ginwang, Hka Karan Yang Mare na hpung masha ni hpe ( 7 February 2026 ) ya shani sa du kawan hkrum shaga nna, akyu hpyi shaman da ya ai hte shana maga de Sumpra Bum St. Patrick Nawku jawng wang de du lung wa sai rai nga ai.

Hpung kawan du lung wa ai Wa Saradaw hte wa jau ni hpe ginwang up Wa Jau Luka Marawng Zau Tu hte nawku hpung masha ni, mare buga ni kawn wunpawng madum sumpyi, htunghking magun shat lit ni hte kabu gara hkap tau hkalum la ai.

Saradaw hpe hkap tau la ai hpung masha ni

8 February 2026 ya jahpawt Sumpra Bum Muklum, St. Patrick nawku jawng wang hta gaw gap da lu sai Sagu Rem Kaja Mung Bawng Htingnu ningnan hpe hpaw shaman akyu hpyi ai hte Laban Missa Hkungga hpe hpung masha ni law law hte galaw la lu sai.