Daini na hti ang ai Madu a Kabu gara shiga gaw Marku a Laika 8:11-13 hta na rai nga ai.

Kabu gara shiga hta Yesu kaw Hparishe ni Mauhpa lamik kumla hpyi ai lam hpe na la lu ga ai.

Kam sham myit a majaw hpyi ai nrai chyam dinglik mayu ai majaw hpyi ai rai nga ai. Yesu mung shanhte chyam dinglik ai re hpe chye majaw lamik kumla hpa mung n madun ai sha shanhte a lapran kawn pru mat wa nga ai.

Kalang lang anhte a prat hta mung ntsa lam lamik kumla chyu tam let Yesu hpe anhte a prat kawn pru mat wa hkra gau kau ai zawn re ten ni law law rai nga ai. Yesu gaw anhte shi a ntsa nga ai makam hpe yu nna lamik kumla ni jaw ya ai rai nga ai re.

Lamik kumla chyu tam shakut nga yang ba wa na re, myit daw wa na re, myit htum wa na re, makam masham hpe shawng ngang kang hkra shakut hkawm sa ra ai re. De hpang she lamik kumla hpe anhte a sak prat hta tatut hkam la lu na re.