Ash Wednesday

Daini hti ang ai Madu a kabu gara shiga gaw Mahte 6:1-6/16-18 hta na rai nga ai.

Daini gaw Wanwu chya ai shani Lusha Gam Ladaw shang ai shani rai nga ai. Wanwu gaw hpa hpe shadum ya nga ta? Anhte shinggyim masha gaw gara kaw na sa wa na gara de bai wa ra ai lam hte Karai Kasang kadai re ai lam hpe shadum ya nga ai. “Shinggyim masha e nang ga yun rai nga ai majaw ga yun de bai wa ra ai hpe myit dum u” Sak hkrung hkawm sa ai ten namak law hpa ai lam ni, myit tsaw myit dap ai lam ni, lu dum ai, nju ndawng ai, shatan ai dai zawn re ai myit masa law wa yang anhte kadai re, gara kawn sa wa nna gara de bai wa ra ai lam hpe dum hprang na matu re.

Daini kaw nna nhtoi (40) ya tup Lusha Gam ai, alu atan bang shakut ai, akyu hpyi ai ndai lam masum ja ja shakut ra nga ai. Lusha Gam ai ladaw ngu ai gaw Paska ladaw hta gingdan ai hte shang lawm lu na matu tinang a wenyi hpe lajang shachyip ai ladaw mung rai nga ai.

Daini na Kabu gara shiga hta mung Lu sha gam ai ten hta tawn da ra ai myit masa lam ni hpe shadum ya nga ai. Ntsa lam masha ni mu mada daw nre sha ndan npra re shara hta nga let Lu sha gam ra ai lam shadum ya nga ai.

Hkungga tsawra ai Nu, Wa Hpu Nau ni Lu sha gam ai ladaw gaw anhte hpe Mungkan lam hta chyu pyaw len myit masin hpe Karai Kasang hte bai ni htep wa hkra lajang ra ai ladaw rai nga ai.

Lu sha gam ai ladaw gaw kaga ladaw ni hta na hkan sa na yak dik ai ladaw re ai zawn Karai Kasang hte mung ni htep dik ai ladaw re ngu mung mai tsun nga ai. Hpa majaw nga yang Lusha gam ra ai sha n-ga, tinang a nhkru nkaja ai myit masin hpe ndang nyet koi yen let udang hpe hpai ra ai hkrun lam hkawm ai majaw re.

Daini Lu Sha Gam ai ladaw hpang ai shani kaw nna ngut ai ten du hkra tinang a myit hpe ningdang nyet kau let Karai Kasang a myit ra sharawng ai hte maren hkawm sa wa ga.