N HKRU N KAJA AI GA SI NI HTE LAWAN LADAN DAWDAN, JE YANG AI LAM NI HPE KOI GAM GA
Wa Sarabyin Leo XIV a 2026 ning na Lusha gam ladaw shadum jahprang mungga hta, Kahtawlik hpung masha ni hpe, madat mara ai lam, lusha gam ai lam, kahkyin kumdin lam hpe madung tawn nna, myit malai lu ai hkrun lam hku nna, Lusha gam aten hpe sak hkrung hkawm sa na matu saw shaga da nga ai.
Ash Wednesday (February 18) ‘wan wu chya ai’ shani, Wa Sarabyin gaw Hkristan ni hpe Karai Kasang hpe anhte a prat hta shara jaw na matu, Hkristu a n-ni n-kri lam, si hkam ai lam, bai hkrung rawt ai lam ni hpe bai myit yu na matu n-gun jaw da ai.
Shi gaw Karai Kasang hte kaga masha ni hpe madat mara na matu ahkyak ai lam hpe ahkyak shatai tsun dan ai—grau nna matsan mayan ni hte tsin-yam tsindam hkrum nga ai ni a hkrap ngu hkrap ngoi ai n sen hpe madat na matu tsun da nga ai. Chyoi Pra ai Chyum Laika gaw, kam sham ai ni hpe ndai hkrap ngu hkrap ngoi ai nsen hpe chye na nna, matsan dum myit hte bai htang na matu karum ya ai, dai sha n-ga, matsan mayan lam gaw langai hkrai, shinggyim wuhpawng hku nna, Nawku hpung hpe chyam dinglik nga ai hpe grau chye na hkra karum ya ai, nga nna tsun ai.
Lusha gam ai lam hpe myit sumru let, Wa Sarabyin Leo gaw, lu sha hte seng ai sha n-ga, anhte a ra sharawng ai, myit marin ai lam ni hpe chye na nna, hkang da ai lam re, nga nna sang lang dan nga ai. Teng man ai lusha gam ai gaw tara rap ra lam a matu kawsi hpang gara ai myit hpe jasu ya nna, myit n pyaw ai lam kaw na lawt lu shangun ai, tinang hkum hpe hkang lu na matu sharin ya ai. Raitim, gumrawng gumtawng ai lam n re ai sha, makam masham hte shagrit shanem ai myit hte hkan sa ra ai.
Shi a mungga a madung hta, Wa Sarabyin gaw, n hkru n kaja ai ga si ni, lawan ladan daw dan tara jeyang ai lam, jahpoi asawng ai lam, n ju n dawng ai ga ni hpe Hkristan dinghku, bungli galaw ai shara, social media, mung masa, Nawku hpung wuhpung wuhpawng ni hta anhte a ga hpe “shazim, jahkring kau” na matu tsun shadut dat ai, shing n rai yang gaw, nju ndawng ai ga ni gaw myit mada shara hte simsa lam a ga ni hpe shara jaw kau lu na re lam hpe tsun shadum dat ai.
“Anhte a ga hpe kaja ai ‘postive’ hku jai lang lu na matu, ndai lusha gam ai ladaw hta hpyi la ga, shing rai yang, hkra machyi shangun ai ga si ni yawm mat wa nna kaga masha ni a nsen hpe shara kaba jaw lu na re,” nga nna tsun shadum da nga ai.