Bishop Mung Ngawn John La Sam A N’gun Jaw Ga;

“Ndai shara gaw htani htana n re, kade nna yang anhte bai ngwi pyaw simsa wa na hpe myit mada let akyu hpyi shakut ga”

Anhte yak hkak ai lam ni gaw law law rai na re, yak hkak ai lam gaw n htum na re. Raitimung ahkyak dik ai gaw anhte buga de bai wa lu nna ngwi pyaw simsa ai hte bai nga lu na gaw ahkyak dik rai nga ai. Dai hpe akyu hpyi shaja ga, Karai Kasang ndang di lu ai lam n nga ai.

Kalang lang gaw anhte myit ra ai hta Karai Kasang myit ra ai lam grau kaba ai, shi a yaw shada lam nga ai. Dai re majaw anhte gaw akyu hpyi shaja nna du na aten ni hta e ngwi pyaw simsa ai hte buga de bai wa nna Karai Kasang hpe ngwi pyaw simsa ai hte shakawn kungdawn lu ai aten ni hpe bai myit mada nna shakut shaja nga ra ai aten rai nga ai. Ndai shara gaw htani htana n re, kade nna anhte bai ngwi pyaw simsa wa na hpe myit mada let akyu hpyi shakut ga. Nsim nsa Rosary hti shakut nna shaman chyeju hkam la ga, kade nna yang ngwi pyaw simsa wa na hpe myit mada let ja ja akyu hpyi ga.

Nanhte hpyi shawn ai lam ni yawng hpe mung dang di ai made mai byin ai hku nna shakut shaja garum shingtau la na matu galoi mung myit taw nga ai re. Ginwang up jau ni, Sara/ma ni, committee ni the jahkrum nna gara hku lu garum sa wa na ngu ai hpe bai bawng ban jahkrup wa na re ngu yawng hpe n’gun jaw dat ai.

Jan. La Tsen Ja Nu ( Hpyen yen );

Phone line mung n lu ai, ayak ahkak rai gara hku kaning rai na, kadai hpe gara hku tsun na, hpaji hpyi na n chye rai nna myit ru tsam pu ai ten anhte hpe myit dum ai hte Wa Saradaw hte wa jau ni sa du kawan yu ai majaw ndang tsun hkra chyeju dum ai,  Karai Kasang hpe mung grai chyeju dum dik ai.

Anhte yawng grai myit ru ai hte ndai kaw nga taw ai re, myit hta grai tsang let nga taw ra ai. Yawng gaw buga de wa mayu ai ni hkrai rai ga ai. Dai majaw Wa Saradaw, Wa Jau ni byin mai ai daram seng ang ai de tang shawn ya na hpe ra sharawng ai.

Slg. Peter La Awng ( Ningtau Camp up )

Hpung masha langai hku nna hkam sha lam hpe tsun ga nga yang nawku hpung masha ni gaw Wa Saradaw ngu ai hte n hkrum ai shaning law law rai nna daini ta shakram lu ai, hkrum zup lu ai majaw ngai hku nna grai myit dik myit pyaw ai lam hpe lu la ai.

Daini Wa Saradaw anhte hpe du kawan nna ninggun jaw ai mungga hta akyu hpyi ai lam hku nna tinang a mare buga de bai wa lu na matu akyu hpyi shakut ga nga ai hpe mung grai n’gun lu ai. Bai nna Mungdan a magam gun ai ningbaw ningla ni hpe shatan nhkan na malai akyu hpyi garum ya ai hku nna mai kaja ai de woi awn woi sa lu na, mungdan simsa wa lu hkra woi awn lu na matu akyu hpyi garum ya nga ga, shada shatan nhkan na malai akyu hpyi ai hte n’gun la nga ga nga ai hpe mung n’gun lu ai.

Hpyen yen camp hpe garum ya sai ni yawng hpe grai chyeju dum ai. Matut nna camp hta ra kadawn ahkyak nga ai tsi mawan hte malu masha, ma ni a hpaji lam, camp masha ni a  shinggyim bawng ring lam, rawt jat galu kaba lam, machye machyang lam sharin hpawng ni hpe mung sa du sharin ya na uhpung uhpawng ni, nawku hpung ni hpe mung hpyi lajin mayu ai. Sa du sharin ya na hpe ra sharawng ga ai.  

Jan. Laja Htu Bu ( Hpung tau )

Ya daini anhte hpyen yen kaw myit pu ba nna  jam jau yak hkak ai shara hta Sagurem wa, Wa Saradaw hte wa jau, brother ni, alu madu ni sa du kawan ai majaw grai n’gun lu ai hpe hkam sha ai. Wa Saradaw Mungga shaga ai shaloi myi prwi pru na daram hkam sha ai re, grai chyeju dum ai. Anhte hpe buga de wa lu na matu mung Wa Saradaw ni akyu hpyi garum ya mi.

Anhte hpyen yen ni grai yak hkak nga ga ai. Ndai kaw hkai lu hkai sha, galaw lu, galaw sha na matu hkai nmai ni n kaja ai, hkai lu hkai sha mung n mai ai majaw shat mai shat maw yak ai. Masha ni garum ai sha, sha lu ai, garum ai ni dawm wa jang lusha grai yak ai. Ma ni jawng sa jawng wa aten hta mung myit hta n shim lum ai majaw jawng ma ni hpe mung grai tsang ai. Dai majaw buga de lawan wa mayu ai.

Hpung Ngai Yang hpyen yen dabang gaw Sumpra Bum jau ginwang hta hpaw tawn da ai rai nna, Lung Sha Yang jau ginwang kata na Sumpyi Yang, Ntsi Yang, Wa Dat Mare na buga masha ni lai wa sai 2024 ning June shata kaw nna hpyen koi yen taw ai shara rai nga ai.

Hpyen yen dabang hta hpyen yen htinggaw ( 250 ), masha jahpan ( 1366 ) nga ai. Buga masha ni gaw gasat gala majan byin wa ai majaw lai wa sai 2024 ning May shata ( 11 ) ya shani mare buga kaw nna hpyen yen hprawng hkawm mat ai rai nna June shata ( 10 ) jan ya hta Hpung Ngai Yang hpyen yen dabang hku nna nga hpang wa ai hte ya aten du hkra mare buga de bai wa na ahkaw ahkang n lu ai majaw hpyen yen dabang hta yak hkak jam jau hkrum let shanu shingbyi taw ra ai rai nga ai.