Readings: 1st: Gen 7:7-9. 3: 1-7; Ps 50; 2nd: Rom 4:12-19; Gos: Mt 4:1-11
Daini gaw, Chyoi Pra ai Wenyi a atsam hte gunglau ai lam hte yubak mara hpe dang kau lu ai ” lahkawng ngu na Adam ” ngu ai Yesu Hkristu hpe shagrau sha-a na matu Nawku hpung gaw anhte hpe saw shaga nga ai. Kawa a myit ra ai lam hpe madat mara ai hku nna, Hkristu gaw mungkan hpe bai gram lajang ya sai. Dai majaw, ‘ndai aten gaw, sharin achyin ai lam kaba, nden marai, sadi maja ai lam, Karai Kasang hpe ngang ngang kang kang kam sham ai lam ni hpe ra sharawng nga ai.
Daini daw 1hta anhte a hkye hkrang la ai labau a npawt nhpang hpe bai tsun dan ai. Anhte yawng gaw, anhte a kaji kawa ni a n madat mara ai majaw, gunglau ai lam hte Original Sin hpe hkungga ai ni tai wa saga ai. Dai majaw, ndai lam gaw, San Augustine tsun ai “Massa damnata” (masha law law hpe tara jeyang ai lam) byin pru wa shangun ai. Ndai daw 1 kaw nna, gunglau ai lam gaw shi hkum nan yubak n re ai hpe asan sha mu lu nga ai. Yubak mara ngu ai gaw, anhte a Hpan Madu hpe n madat mara ai hte shingra tara hpe tawt lai ai mara re.
Hpang jahtum Satan a lata de n hkrat sum shi yang, Ewa lai wa sai lahkam ni hpe maram yu yang ram sai. “Dai numsha gaw…chye chyang ai lam a matu ra sharawng hpa rai nga ai hpe mu nna, dai namsi nkau mi hpe la nna sha kau ai.” Ndai gaw anhte a shani shagu na shakut shaja ra ai lam a shingra tara rai nga ai. Anhte shani shagu myit dik hkra shakut nga ai “Id” hte “Ego” a manghkang langai mi rai nga ai. Anhte law malawng gaw, machye machyang tam ai hta grai myit lawm ai majaw, Karai Kasang a myit ra ai lam hte hkang da ai ga ni hpe ninghkap na matu jin jin rai nga ga ai. Dai majaw, n hkru n kaja ai wa a gunglau ai lam ni hpe koi gam ra ga ai.
Daw Lahkawng hta, Pawlu gaw yubak mara a npawt nhpang hpe Adam kaw nna sawk sagawn ai. Shi gaw yubak mara a akyu hpe ndai hku madi madun dan ai: “…Masha shagu yubak galaw ai majaw si hkrung si htan gaw shinggyim masha ni hta chyam bra wa ai.” Tsun mayu ai gaw, yubak mara gaw asak hpe jahten sharun nna si hkrung si htan de woi sa wa ai. Hkrit tsang ai, myit mada shara n nga ai, kaya kahpa byin shangun ai.
Raitim, Pawlu tsun ai hku nga yang, anhte myit mada shara n nga ai n re, hpa majaw nga yang: “Hkristu kaw na lwi pru wa ai Karai Kasang a Chyeju” gaw anhte hpe hkye hkrang la nna, mara raw dat ya ai. Shi hta manoi nga yang, gunglau ai lam hte yubak mara hpe dang manga lu na atsam hte chyeju hpe lu la na re. Dai majaw ndai aten gaw Chyeju hkam la na a aten rai nga ai.
Kabu gara shiga gaw anhte shani shagu hkrum sha nga ai tsin-yam tsindam ni hpe shadum ya nga ai. Dai gaw shani shagu anhte hkrum sha nga ai gunglau lam re. “Wenyi” re majaw, nat gaw anhte grau ra kadawn ai lam hpe chye ai aten law law nga ai. Dai majaw, Hkristu hpe gunglau ai zawn, anhte hpe mung dai hte maren gunglau nga ai. Anhte kawsi nga yang, lusha hte gunglau nga ai. Anhte hpang gara nga yang, lu sha hte gunglau nga ai. Anhte gaw daru magam hpe ra sharawng yang, dai hte shi anhte hpe gunglau ai.
Gumhpraw ra ai rai yang, masha wa hpe lagu la na matu nat tsa tan wa gunglau nga ai. Nang bungli ra yang, bungli lu na matu, gumhpraw jaw na matu shi gunglau ai. Nang gaw marks hpe grai ra sharawng ai rai yang, shi gaw nang hpe exam hta hkalem na matu gunglau ai. Langai gaw gunglau ai lam langai hta hkrat sum mat ai shaloi, hpang jahtum e sum mat ai aten du hkra, kaga gunglau ai lam hpe matut galaw nga ai. Shi gaw grai hpaji kung ai hte “lahkam langai hpang langai” hta kungkyang ai wa re!
Yesu gaw Satan hte shi a gunglau ai lam ni hpe gara hku awng dang lu wa ai kun? Shi dang kau ai gaw, shawng e, shi hkum shi ngang kang hkra galaw da sai majaw re. Shi gaw arawng aya kaba mayu ai myit hte kaman lila gumrawng gumtawng ai myit hpe hkang lu ai. Ahkyak dik gaw, Satan hte shi a gunglau ai lam ni hpe ninghkap gasat ai hta shi hkrai n rai nga ai. Chyoi Pra ai Wenyi shi hte rau nga nga ai. Akyu hpyi ai hte lusha gam ai hku nna awng dang lai wa sai.
Dai majaw, ndai Lent aten hte dai hpang na aten ni hta, jahtum na hkrun lam a matu anhte hkum anhte hkyen lajang ra ga ai. Nhkru n kaja ai wa a agung alau hta n hkrat sum hkra akyu hpyi ai lam hta ngang kang ai hte maja nga ra ga ai.