Daini hti ang ai Madu a kabu gara shiga gaw Mahte a laika 6:7-15 hta na rai nga ai.

Kabu gara shiga hta Madu Yesu gaw shi a sape ni hpe kyu gara hku hpyi ra ai lam hpe sharin ya ai lam hpe na la lu nga ai. Madu Yesu sharin ya ai Kyu Hpyi ga hta n hkum tsup ai lam / hprai nna n lawm mat ai lam hpa nnga ai.

Madu a akyu hpyi ga gaw kyu hpyi ga ni yang a npawt re. Hpa majaw Madu Yesu shi hkum nan sharin da ya ai majaw re.

Anhte yawng gaw akyu hpyi ai hkrai rai ga ai. Masha man hta madat pyaw hkra ma ga si ga ngau ni grai chye lata nna hpyi chye ga ai. Dai zawn mung hpyi chye ra ga ai.

Raitim daini na kabu gara shiga kaw na anhte hpe shadum ya nga ai lam gaw Ga si ga ngau ni grai tsawm htap hkra hpyi chye ai zawn anhte a myit masin hta mung san seng ai shagrit shanem ai myit hte hpyi chye ra nga ai. Hpa majaw nga yang Karai Kasang gaw ga si ga ngau hta myit masin hpe she yu ai Karai Kasang rai nga ai majaw re.

Akyu hpyi nsen gaw masha yawng na lu hkra hpyi jahtau chye ai. Raitim tinang a salum na lu na hkra hpyi na gaw grai yak nga ai. Masha ni hkap la na hta Karai Kasang hkap la na ahkyak nga ai.

Ngai dai ram akyu hpyi ai wa Karai Kasang mung n madat ya ai nga nna aput angun tsun chye nga ai. Anthe malap nga  ai gaw tinang kaning re myit masa hte hpyi ai ngu hpe dinglik yu ra ga ai.