Daini hti ang ai Madu a kabu gara shiga gaw Mathe a laika 5:20-26 hta na rai nga ai.
“Nanhte hpe ngai tsun made ga; nanhte a dingman ai lam gaw, chyum laika sara ni hte Hparishe ni hta n grau yang, nanhte gaw sumsing mungdan de shang lu na nrai”
Hparishe ni a dingman ai lam gaw hpa rai ta? Masha a man hta mu mada daw galaw dan nna myit kraw lawang kata hta gaw n hkru ai lam chyu hpring chyat nga ai.
Karai Kasang hpe tsawra nna tara hkan ai n rai, Masha ni a man hta mu mada daw hkan ai ni re.
Hparishe ni a dingman ai lam hta gawngkya ai lam hpan (3) mu lu ai.
- ntsa lam san san sha re nga ai.
- Gum rawng ai, masha hpe yu kaji ai (Ngai gaw tara lam ni hpe grai shadik ai wa re ngu myit rawng ai )
- Myit masin salum nlawm ai (tsawra myit hpe shingdu tawn ai ni)
Hparishe ni hta grau ai dingman lam gaw hpa rai ta? Ntsa lam tara hkan ai hta Karai Kasang a tsawra myit hpe madung da ai lam re.
Sumsing mungdan ngu ai gaw ntsa lam hkan galaw masu ai ni a matu n re sha Karai Kasang hpe kaja wa nan tsawra let dai dingman ai lam ni hpe hkan sa ai ni a matu re lam shadum ya nga ai.