Daini na Ja Chyum Mungga hpe hti sumru yu ai shaloi e, Yesu shi nni nkri hkrum na lam masum ngu na lang tsun ai lam hte Yaku hte Yawhan a kanu Yesu kaw hpyi shawn ai ga ni hpe na la lu ga ai.
Madu Karai Kasang gaw, shi hkrum sha ra ai jahpoi asawng ai, tsun jahpyak ai, Shi hpe anu gayet nna, Udang hta jen noi si hkrum na lam ni hpe mung tau nau chye da ai majaw, tsun ai lam re ai hpe daini na kabu gara shiga hta anhte mu mada nga ga ai. Tau nau chye ai raitim, Madu Yesu gaw htingnut ai, hprawng koi yen kau ai lam n nga ai.
Dai mabyin lam yan mahkra hpe shi hkrum katut hkam la na matu jin jin rai nga ai hpe mu lu ga ai. Dai zawn hkrit tsang yawn hpa lam ni hpe Madu Yesu tsun dan taw nga ai raitim, Kasa ni a myit kraw lawang kata hta e, tinang a matu ahkaw ahkang lu na lam hpe shut ai hku sawn sumru taw nga ma ai. Dai zawn byin ai lam ni gaw, sara rai nga ai Madu Yesu a myit arawn alai hte kasa ni a myit jasat shai ai lam hpe mu mada lu ga ai. Anhte ni mung, kalang lang Karai Kasang a ra sharawng ai lam ni hpe chye ai raitim, tinang byin mayu ai lam hpe chyu sha madung da galaw chye ga ai. Ndai lu sha gam ladaw hta Karai Kasang a ra sharawng ai hpe chye lu na matu, nyan marai n’gun atsam hpe hpyi la ga law.