Asia Mungdan Saradaw Hpung Ginjaw Komiti(FABC), Thai Mungdan Bangkok kaw nna March shata praw 3 ya shani ndau laika shapraw nna, Middle East mungdan ni hta lawan ladan gap hkat jahkring na matu hpyi lajin da ai lam chye lu ai.
Asia Saradaw ni gaw, “Middle East hta zingri zingrat lam ni bai grau sawng wa ai majaw grai myit n pyaw ai lam hte grai myit tsang ai lam” hpe tsun shapraw ai hte ndai aten hta mungkan hte mungdan kaba ni shanglawm ai bawm jahkrat ai lam ni hte matai htang ai lam ni hpe madi madun ma ai.
“Kade nna ai aten hta byin nga ai bawm jahkrat ai lam hte matai htang ai lam ni hta, mungkan hte n-gun kaba ni lawm ai majaw, ndai ginra hte mungkan hta n dang hti ai shinggyim masha hte sut masa kra machyi ai lam ni byin wa na masa nga ai” nga nna ndau laika hta tsun da ai. “Continent, Asia dan langai hku nna, ndai manghkang hpe grau nna myit tsang nga ga ai,” nga nna Saradaw ni matut tsun ai.
FABC gaw Wa Sarabyin Leo XIV a hpyi lajin ai lam hpe bai kahtap tsun nna, “simsa lam hpe jahkrit shama ai, hkra machyi ai lam, si hkrung si htan byin shangun ai lam (sh) laknak ni a ntsa e gawgap nmai ai” nga nna madi madun da ai.
“Hkrit tsang ai lam kaw nna ngang grin lam n mai byin ai, tara rap ra lam hpe mung zingri zingrat ai lam hku nna n mai byin ai. Myit masin san seng ai, lit la ai, ngang grin ai bawngban hpawng ni sha, tara rap ra ai hte grin nga lu ai simsa lam de sa wa na lam ni hpe hpaw ya lu na re,” nga nna Jau ni tsun ai.
Asia dan hta nawku htung amyu myu hte matsan masha ni a shani shagu na tsin-yam tsindam ni hpe yu nna tsun shaga ai shaloi, Saradaw ni gaw simsa lam lu na matu tara rap ra ai lam hte masha shada kam hpa hkat ai lam ra nga ai. “Simsa lam gaw majan n nga ai sha n rai. Tara rap ra ai lam a asi, bawngban hpawng galaw ai, myit galu let amyu sha ni a lapran kam hpa hkat ai lam hpe gawgap ai lam re” nga nna tsun ma ai. Majan gaw “matsan mayan ni, hprawng yen nga ai ni, ma ni, htawm hpang na prat ban ni hpe hkra machyi shangun ai” ngu sadi jaw ma ai.
Saradaw ni gaw, “hpyen masa hpe kalang ta jahkring kau na matu hte, grau sawng ai tsin-yam tsindam hte n mai nhtang wa ai sum mat ai lam de sha woi sa wa ai, grau sawng wa ai spiral hpe ninghkap let, shinggyim sari sadang lit hpe gun hpai na matu” saw shaga ma ai. Bai nna, “manghkang ni hpe hparan na matu, mung masa ladat hpe bai gram lajang na matu” tsun shadut ma ai. “Bawngban hpawng gaw kade yak hkak tim, amyu sha ni a sari sadang hte amyu bawsang ni a awmdawm ahkaw ahkang hpe hkungga ai lam langai rai nga ai” nga nna ndau laika hta tsun da ai.
FABC gaw “makam masham lapran na kahkyin gumdin lam, grau nna ndai ginra hta nga ai makam masham htunghking kaba ni a ningbaw ningla ni a lapran, asak hkrung lam a chyoi pra ai lam hpe rau jawm sakse hkam na matu” matut nna n-gun jaw ai hte “matsan mayan ni hte majan a majaw tsin-yam hkrum ai ni hte rau tsap na matu, shanhte a hkrap ngu hkrap ngoi ai lam ni hpe madat ya na matu” tsun shadum da ai.
“Ndai Lu Sha Gam aten hta Asia mungdan ting na anhte a buga Nawku hpung ni yawng hpe akyu hpyi ai lam, lusha gam ai lam, simsa lam a matu ngang grin ai hku kahkyin gumdin ai lam ni hpe grau nna galaw sa wa na matu saw shaga ga da nga ai.
