Daini na Ja Chyum Mungga hpe hti sumru yu ai shaloi e, Lu su ai wa hte Lazaru a ga shadawn hpe na la lu ga ai. Kahtawlik hpung masha ni rai nga ga ai anhte ni gaw, Lazaru hte sahti wa a maumwi mabyin hte hkau chyap chyalu rai nga ga ai. Ndai Sahti kaba wa shi a prat hta mara galaw ai lam chyum laika hta n mu lu ga ai. Raitim shi a nta shawng kaw nga ai Lazaru hpe shi gawn lajang lanu lahku ai lam n galaw ai. Tinang a sutgan kaw sha len taw nga ai hpe mu lu ai.  Ya daini na Chyum laika daw (1) hta mung masha ni hte sutgan rung rai ni kaw sha myit marin pyaw hpa lam n nga na matu sadi jaw da nga ai.

Shingrai tara lam ni a ningpawt madung gaw, Karai Kasang hpe tsawra na hte ni htep ai ni hpe tsawra na rai nga ai hte maren, tinang hte ni htep ai ni a ra kadawng ai lam ni hpe n chye ya ai ni, chye nga tim mung n mu ai zawn kabai da chye ai ni gaw Tara lam hpe n hkan shatup ai rai nga ai. Dai ni gaw jeyang daw dan ai hkrum na teng sha re. Dai re majaw anhte ni yawng mung ndai lu sha gam ladaw hta grau nna tinang hte ni htep ai ni a myit masin hkum hkrang hte ra rawng ai rung rai ni hpe shingdu gayin da ai hku n re sha, garum shingtau la ga. Ndai lusha gam ladaw hta alu atan sak jaw ai magam lam ni hpe grau nna shakut sa ga law.