Daini na Ja Chyum Mungga hpe hti sumru yu ai shaloi e, Sun shap galaw ai ni a ga shadawn hpe na lu ga ai. Madu Karai gaw anhte a ntsa tawn da ai tsawra myit ni hpe daini na chyum mungga hta mu lu nga ga ai. Nang ngai yawng hpe mungkan ntsa hta sa pra nga shangun let, chye ju wunli a myu myu hte makawp maga bau sin ya nga ai. Ndai kaba la ai chyeju ni hpe dum chye let, tinang a prat hpe manu shadan chye ai ni rai na mung grai ahkyak nga ga ai. Bai tinang a prat hte tinang hpe jaw da ai lit magam ni hpe mung galaw hparan chye na ra nga ga ai. Dai lit magam ni hpe manu shadan ai, kangka ai hte galaw gun hpai sa na mung grai ra ahkyak nga ai.

Anhte dai lit magam hpe hprai ai rai yang, Karai Kasang kaw nna hkam gring ai mara ari dan jaw na teng sha re. Anhte ndai lusha gam ladaw hta tinang a Wenyi sak hkrung lam hpe sumru dinglik yu ga. Ngai hte Karai Kasang a lapran na matut mahkai ai lam gara hku ra rawng nga ai kun? Ngai hte htingbu ni htep ai ni a lapran hta na, matut mahkai kanawn mazum lam ni, ngai hte shingra tara a lapran na mu mada mahku mahkau tsun shaga lam ni hpe madu nan dinglik yu ga. Anhte yawng gaw ndai mungkan ga hte e, shingra tara ni a mabyin lam ni yu makawp maga hting hkang sa na lit lu ai ni re hpe myit dum let, matut nna yu gawn lajang pawn ba sa ga law.