March shata 11 ya shani galaw ai General Audience hta Wa Sarabyin Leo XIV gaw, Vatican Zuphpawng II a laika buk Lumen gentium hpe myit sumru let, Nawku hpung gaw ‘mungkan ting a matu kahkyin gumdin lam hte simsa lam a kumla hte myihtoi ga’ re ai hpe ahkyak shatai tsun shalawm da nga ai. Manghkang, garan ginhka ai lam ni hte hpring chyat nga ai mungkan hta, Nawku hpung gaw Hkristu hpe kam sham ai hte Shi a tsawra myit the amyu bawsang, ga amyu myu, htunghking amyu myu nga ai ni hpe shinggyin la nga ai. Ndai lam a majaw, Nawku hpung gaw shi hkum shi galoi mung n pat shingdang ai sha, ‘masha shagu a matu hpaw da ai’ hku nna nga ra ai.
Karai Kasang a hkye hkrang la ai masing gaw Shi lata la ai amyu langai hku nna labau hta byin pru wa ai lam Wa Sarabyin sang lang dan ai. Ga Shaka Dingsa hta Abraham kaw nna hpang nna, Karai Kasang gaw amyu bawsang ni a nhtoi tai na matu shaga la hkrum ai amyu hpe hpaw shabawn da sai. Ndai sasana gaw Yesu Hkristu hta hpring tsup wa ai rai nna, Shi a Hkum hte Sai a marang e shi a amyu masha ni hpe kahkyin gumdin let, hkum tsup ai ga shaka ningnan hpe gaw gap da ai wa rai nga ai.
Dai majaw dai ni na Nawku Hpung gaw ‘Hkristu hta kahkyin gumdin ai Karai Kasang a amyu masha ni’ rai nga ai. Shi a hpung masha ni gaw amyu bawsang shagu kaw na du wa ai rai nna, htunghking, amyu bawsang a majaw n rai, ‘chyeju san san the sha Karai Kasang a kasha shayi sha ni’ ngu ai masat dingsat a majaw kahkyin gumdin nga ga ai. Hkristan ni a ahkyak dik ai sari sadang gaw shanhte a lit magam (sh) arawng aya n re ai sha Hkristu hte kanawn mazum ai lam rai nga ai.
Wa Sarabyin gaw, Nawku hpung a lam madun ai tara gaw ‘tsawra myit’ rai nna, yaw shada ai lam gaw ‘Karai Kasang a Mungdan’ rai nna, dai de shinggyim masha yawng hte rau hkawm sa nga ai hpe ahkyak shatai tsun shalawm da nga ai. Dai majaw, Nawku hpung hte Hkristan shagu gaw, shara shagu hta Kabu Gara Shiga hpe hkaw tsun na matu shaga la hkrum ai rai nna, masha shagu hte htunghking yawng hpe hkap tau la ai sha n-ga, Kabu Gara Shiga gaw shanhte hpe jasan jaseng, sharawt shstsaw ya na ahkang jaw da nga ai.
Jesuit Karai masa ninghkring Henri de Lubac a ga hpe lakap nna, Wa Sarabyin gaw, Nawku hpung gaw langai sha rai tim, ‘masha shagu a matu shara nga ai, shinggyim masha amyu bawsang amyu myu hpe hkap tau la lu ai hkye hkrang la ai ‘sanghpaw li kaba’ zawn tai ra ai.