Daini na Ja Chyum Mungga hpe hti sumru yu ai shaloi e, kaba dik ai tara kanu a lam hpe na chye lu ga ai. Madu Yesu tsun ai gaw, Madu Karai a ntsa tawn da ai jet ai makam masham nawku daw jau ai lam gaw, shi Madu Karai hpe myit masin mahkra hte tsawra ai hte, kaga masha wa hpe mung manawn masham myit n rawng ai tsawra myit hte tsawra na madung re ngu daini na kabu gara shiga hta e anhte hpe sharin ya nga ai. Shingrai ndai tara kanu lam hpe hkan sa shakut nga ai anhte yawng mung, tinang a makau grup yin kaw nga nga ai htingbu wa hpe tengman tsawra myit madun lu let nga sa ga.

Grau nna gaw tinang n lu tsawra ai ni, bai tsawra myit madun lu na yak hkak taw nga ai mabyin ni hte tsawra matsan dum lam hpe madun dan lu hkra shakut sa nga ga. Ndai tara lam lahkawng yan gaw anhte a makam masham a akri madung nan mung rai nga ai re. Bai nna tinang hte n hku hkau ai wa hpe matsan dum lama ai ga si ni tsun lu hkra shakut sa ga. Dai n rai yang e mung tsawra ai lam a kumla lama ma mi lu galaw madun dan lu hkra shakut sa ga. Ndai zawn galaw sa ai lam gaw, Madu Karai Kasang hte tinang hte ni htep ai ni hpe tsawra lam madun ai kumla nan re. Dai majaw hkungga ai shiga madat ni e, Madu Yesu sharin ya ai matsan dum lama ai lam ni hpe tinang a prat hta e shadan shadawn lu hkra nga sa ga law.