Matsan mayan ni a hkrap ngu hkrap ngoi ai nsen .
8. Karai Kasang gaw wan hkru nga ai hpun kata kaw Mawshe hpe shi hkum shi hpaw shadan dan ai Chyoi Pra ai Chyum daw gaw ndai shakut shaja ai lam a matu tut nawng npawt nhpang tai wa lu ai. Dai shara hta shi ndai hku tsun ai: “Egutu mung e nga ai nye a amyu masha ni a tsin-yam tsindam hpe ngai mu nngai, shanhte hpe bungli galaw shangun ai ni a majaw shanhte a hkrap ngu hkrap ngoi ai hpe ngai na nngai, shanhte a nni nkri hpe ngai chye nga nngai, shanhte hpe hkye la na matu ngai yu hkrat wa ni ai… Dai majaw sa wa rit, ngai nang hpe shangun dat na de ai” ( Pru 3:7-8,10). [7] Karai Kasang gaw matsan mayan ni a ra kadawn ai lam ni hpe myit dum ai lam hpe ndai hku madun dan nga ai: “Israela amyu masha ni Yehowa hpe jahtau ma yang, shi gaw shanhte a matu hkye hkrang la ai wa hpe shangun dat wu ai” ( Tara Agyi 3:15 ). Matsan mayan ni a hkrap ngu hkrap ngoi ai hpe na lu ai hta, shi a kashu kasha ni, grau nna grau nna ra kadawn nga ai ni a matu galoi mung myit dum nga ai Karai Kasang a myit masin kata de shang na matu hpyi shawn da nga ai. Dai jahtau garu ai lam hpe anhte n htang n ya ai rai yang, matsan mayan ni gaw anhte hpe ninghkap nna Madu hpe jahtau garum na rai nna, anhte gaw mara lu la na re (cf. Tara Jahprang 15:9) hte Karai Kasang a myit masin kaw na htingnut mat wa na re.
9. Matsan mayan ni a masa gaw, shinggyim labau hta, anhte a prat, shinggyim wuhpawng, mung masa hte sut masa masa ni hpe,Nawku hpung hpe mung, galoi mung shadut nga ai hkrap ngu hkrap ngoi rai nga ai. Matsan mayan ni a hkala nba hkrum ai myi man ni hta, mara n kap ai ni a nni nkri hpe Hkristu shi nan a nni nkri hpe mung mu lu ga ai. Dai hte maren, matsan mayan ni a myi man law law hte matsan mayan hkrum ai lam hpe mung, lam amyu myu hku nna byin pru wa ai lam re majaw, grau nna tsun shaga ra na re. Kaja wa nga yang, matsan mayan lam amyu myu nga ai: sut masa lam hta shinggyim wuhpawng hta shingdu tawn da hkrum nna, shanhte a sari sadang hte atsam marai ni hpe nsen shapraw lu ai atsam n nga ai ni a matsan mayan ai lam, akyang lailen hte wenyi matsan mayan ai lam, htunghking matsan ai lam, shinggyim nga pra masa hta n-gun n rawng ai ni a matsan mayan ai lam, shanhte hkum shanhte ahkaw ahkang n lu ai, shara n lu ai, lawt lu lam n lu ai ni.
10.Ndai hku nna, matsan mayan ni hpe garum shingtau ai lam hte matsan mayan byin shangun ai shinggyim nga pra masa hte hkrang masa lam ni hpe yeng seng kau na matu ga sadi jaw ai lam gaw, lai wa sai shaning tsa lam hku na sai raitim, n hkum tsup shi ai ngu tsun mai nga ai. Ndai lam gaw anhte a shinggyim wuhpawng ni gaw n rap ra ai lam law law hte masat da ai prat masa hte mung masa hpe woi awn na matu masat masa ni hpe ra sharawng ai majaw mung rai nga ai. Dai majaw, anhte chye na wa nna, gasat gala na matu shakut nga ai matsan mayan masa dingsa ni hta, kalang lang grau nna n-gun n rawng ai, hkrit tsang hpa matsan mayan masa nnan ni mung jat wa nga ai. Ndai hku yu yang, Mungkan Wunpawng Hpung gaw matsan mayan lam hpe yeng seng kau na hpe Shaning Hkying Mi Yaw shada ai lam langai hku nna masat da ai hpe hkap tau la ging ai.
