Daini na Ja Chyum Mungga hpe hti sum ru yu ai shaloi e, Laban shani Yesu Ana ahkya shamai ya ai lam na lu ga ai. Madu Yesu gaw, Bethesda hka lawng makau kaw nga ai (38) ning tup machyi nga ai wa hpe tsi shamai ya ai mabyin hpe du salang ni sa san ai shaloi e, Yesu Madu gaw, Kawa Karai Kasang hte shi a reng power madun ai hpe mu lu ma ai. Dai machyi ai masha wa gaw shi hkum nan n lu galaw ai mabyin lam ni hpe Madu Yesu tsi shamai ya ai re hpe mu mada nga ai. Dai zawn anhte hkum nan mung hkum hkrang hta hkam ja lam ningra mat wa ai shaloi e, tinang hkrai hpa mung n dang di lu ai ten ni nga ga ai.

Dai shaloi e, Madu Karai chyu sha dang di lu ai. Shi Madu sha tsi shamai ya lu ai lam daini na kabu gara shiga hta ning gun jaw ya ai re. Madu Karai Kasang gaw anhte a hkum hkrang hkam ja na matu chyu sha n rai, myit masin hte wenyi hta e hkam kaja na matu mung tsi du kaba nan re ai hpe tut nawng dum ra nga ga ai. Ndai Lusha gam ai ladaw hta e anhte a wenyi hkam kaja na matu mung hkan sa shakut ra ai ladaw rai nga ga ai. Dai majaw anhte a hkum hkrang hte myit masin Wenyi mung hkam kaja zet let ra ga ai. Anhte hta lak san hkum hkrang hte Myit masin hta n hkam ja ai lam ni hpe mung Madu Yesu tsi lajang shamai ya rit ngu akyu hpyi nga ga law.