Daini na Ja Chyum Mungga hpe hti sumru yu ai shaloi e, , Karai Kasang a kasha a magam bungli ni a lam hpe na chye lu ga ai. Dai Madu Yesu gaw, shi a ahkaw ahkang, power hte shi a galaw lu ai atsam marai ahkang aya ni mahkra gaw kawa Karai Kasang hte tut e matut taw nga ai lam ni hpe tsun da nga ai. Shi a ga madat nna, shi hpe shangun dat ai wa kawa Karai Kasang hpe kam sham ai ni yawng hte gaw htani htana asak lu la na re nga nna ga sadi jaw da ya sai. Ndai tara lam hpe dai ni na kabu gara shiga hta dan dan leng leng anhte hpe tsun sharin da ya nga ai.

Anhte a shani shagu na sak hkrung hkawm sa nga pra sa ai lam hta e Madu Karai Kasang ra sharawng ai lam hpe hkan sa let, chye na hkap la lu hkra mung anhte yawng shakut sa nga ga. Anhte ni a galaw sa wa ai magam lam hte, myit shatawng da ai lam ni mahkra gaw, Karai Kasang a ra sharawng lam hte langai sha bung nga ai kun, ngu ai hpe mung sumru dinglik yu ga. Daini na Madu Yesu a kabu ga shiga hte  ahkaw ahkang ni hpe hkap la kam sham nna, hkan lang hkan sa ra ga ai. Shingrai shiga madat nga ai Nu Wa ni yawng hte e, Shi Madu hkum nan sharin achyin ya ai tengman dinghpring ai tara lam ni hte maren, hkan sa na shi Madu ra sharawng nga ai. Dai re ai majaw anhte yawng mung hkan sa lu hkra shakut sa wa ga law.