Daini na Ja Chyum Mungga hpe hti sumru yu ai shaloi e, Hkristu gaw Karai Kasang shangun dat n na du sa ai wa rai nga ai lam hpe na chye lu ga ai. Ya dai ni kasa Yawhan ka da ai kabu gara shiga hta e, Madu Yesu shi nni nkri hkam ai lam, si ai kaw na bai hkrung rawt wa ai lam ni hpe tsun da ai shaloi, Madu Yesu gaw, hkrit tsang ai lam n nga ai. Dai lam mahkra hpe gwi gwi hte shi hkam la sai hpe tsun da nga ai. Dai zawn sha daini na chyum laika hta e mung, Madu Yesu gaw gwi gwi hte tsun ai. Dai gaw ngai gaw nye a myit hte ngai du sa ai n rai, Ngai hpe shangun dat ai wa kaw nna she ngai du sa ai rai n ngai ngu teng sha tsun da nga ai.

Shaloi e Yuda masha ni dai ga hpe na ai shaloi, n dang hkam ma ai. Hpa majaw nga yang e shanhte a hkum hpe Madu Karai Kasang nan lata da ai myu masha ni re ngu kam sham ai majaw re. Dai majaw Madu Yesu a ga hpe n dang hkap la nna, Madu Yesu hpe gyit la na matu shakut nga ma ai. Ndai shara kaw e Madu Yesu a magrau grang gwi ai myit, myit shatawng lam hpe hkrak hkan galaw ai wa nan re. Shi si na hpe n hkrit teng man jaw ai lam hpe gwi gwi tsun shaga ai nsam hpe hkungga kam hpa na zawn rai mu mada lu nga ai. Shing rai Madu Yesu a hpang hkan nang ai anhte hkristan ni mung, teng man ai lam hta tsun shaga tsap gwi ai ni byin ra ga ai. Madu Karai Kasang a matu sak hkrung chye ai Hkristan masha ni byin hkra shakut sa ga law.