Lk 21: 34,36
Raitimung lu lai sha lai ai, chyaru nang ai dinghta ga myitru myit tsang ai hte nanhte a myit masin li nga nna dai nhtoi gaw mahkam htim ai zawn nanhte a ntsa e akajawng sha n du pru u ga sadi nga mu. Dai rai nna dai byin wa na ra ai lam ni yawng hta na nanhte lawt lu nna masha kasha a man e tsap lu ging ai ni tai lu myit ga..akyu hpyi let ahkying aten shagu hta a maja nga mu ngu mu ai.
Ndai laban gaw nawku dawjau shaning C a shawng nnan hpang ai nhtoi shani mung rai nga ai, bai nna Du Sa Ladaw Laban langai mung rai nga ai.
Mabyin lam langai mi hpe tsun dan mayu ai dai gaw mawdaw gau ai masha langai a prat labau rai nga ai. Dai madaw sara wa gaw mawdaw gau wa ai shaning hkun jan sai mung rai nga ai. Lai wa sai shaning hkun jan ning lapran hta mawdaw gau wa ai mile masat gaw sen jahku du sai mung rai nga ai. Mau na zawn re ai gaw shi maw daw gau lai wa ai shaning hkun jan ning lapran hta mawdaw adawt ai lam ngu ai gaw kalang mi mung n byin lai wa ai rai nga ai. Gara hku na dai zawn sadi sahka hte gau lai wa lu a ta nga nna shi hpe masha langai san ai ten shi bai jaw dat ai mahtai gaw lam hpe ngai sadi sahka ai hte yu nna gau ai a majaw re, bai lam makau hkan mu ai byin ai lam ni hpe myit nlen hkrup na ahkyak nga ai ngu nna tsun lai wa ai rai nga ai.
Tsawra ai nu wa hpu nau ni ndai laban gaw nawku dawjau shaning C a shawng ningnan na shani mung rai nga ai,bai nna e Madu Yesu a shangai nhtoi poi a matu hkyen lajang ai hte anhte marai hkum ngau shagu a wenyi sak prat hkrun lam a matu hkyen lajang shachyip ra ai nnan hpang ai nhtoi shani mung rai nga ai. Madu Yesu a shangai nhtoi Hkristmas poi a matu hkyen lajang ai ten hta shinggan mu mada ai lam ni hpe hkyen lajang ai hte myit masin hkyen lajang ai lam nga nna hpan lahkawng nga nga ai.
Mu mada lu ai shinggan hkyen lajang ai lam ngu ai gaw Hkristmas ten hta hpa baw hpun na hpa baw sha na, nta hpe gara hku shatsawm na kadai ni hpe shaga na, gara de sa na sa dam na, gumhpraw kade jai na ngu ai ndai zawn re lam ni hte mu mada lu ai lam hpe hkyen lajang ai lam galaw chye ga ai. Myit masin hkyen lajang ai lam ngu ai gaw shangai nhtoi madu rai nga ai Yesu Hkristu gaw nye a prat nye a wenyi kata de du sa wa ai ten hta gingdan ai hte hkap tau hkalum la lu na matu hte n kaja ai laikyang ni mahkra hpe myit yawn myit malai ai hte prat hpe hkyen lajang nna mai kaja ai lam ni hte hkyen lajang nna san seng nga sai anhte a prat anhte a myit masin hpe shangai nhtoi madu Yesu Hkristu hpe shangai nhtoi masat kum hpa hku nna sak jaw lu na matu hkyen lajang ra nga ga ai. Dai hpe e myit kraw kata hpe hkyen lajang ai lam ngu tsun ai mung rai nga ai.
Mungkan ntsa e nga ai masha malawng maga gaw kraw kata hkyen lajang lam ngu ai htan mu mada lu ai ntsa lam hkyen lajang ai lam hpe grau madung da nga ai hpe mu lu nga ai. Ya na zawn du sa ladaw hta e myit kraw kata hkyen lajang ai lam hpe madung aten jaw nna e mara raw ai, Missa Hkungga hpe man man lung shaja ai hte chyoi pra hkum hpe hkam la lu hkra shakut ai ndai re zawn lam ni hpe galaw na mung ahkyak nga ai.
Adventu ngu ai gaw du sa wa ai ngu ai lachyum rai nga ai. Hkristmas ten hta gaw shawng nnan hku mungkan ga de Madu Yesu du sa wa nna hkye hkrang la ai chyeju hpe jaw na matu yu hkrat wa ai rai nga ai. Mungkan htum ai nhtoi shani hta gaw Parousia ngu ai masha ni hpe tara je yang na matu du sa wa na lam rai nga ai. Dai majaw mungkan htum nna tara jeyang hkrum na nhtoi shani hta e htani htana ngarai kawn lawt nna htani htana sumsing ja mungdan hta ningngai nga lu na matu myit kraw kata hte seng ai lam hpe hkyen lajang da na ra nga ai.
Mungga hta shadum ai hte maren galoi mung akyu hpyi nna a maja nga mu, Madu Yesu du sa wa na lam a matu ala dingda nga ai lam hta e bus mawdaw hkring shara hta e bus mawdaw sa wa na hpe ala nga ai lam hku n re ai sha tinang tsawra ai masha sa wa na hpe shakya let ala dingda nga ai hkrang mahtang rai ra nga ai. Anhte a myit kraw kata de du sa wa na Madu Yesu a matu myit hpe hkyen lajang let akyu hpyi ai hte hkap tau la na ra nga ga ai. Dai zawn hkyen lajang ai hte seng nna Madu Yesu galoi mung shadum ya nga ai lam gaw galoi mung akyu hpyi ai hte ala nga mu sadi maja nga mu. Myit mada kam sham nga mu ngu ai ndai lam ni gaw majoi shadum ya nga ai lam sha n rai nga ai kaja wa gaw anhte marai hkum ngau shagu a matu shimlum lam jaw ya nga ai.
Mawdaw gau ai shaloi shawng de atsawm yu let sadi sahka rai gau ai lam n nga ai mawdaw la a matu accident byin na loi ai zawn mu mada lu ai mungkan lam ngu na arawng aya marin marit ai sut gan ni hpe sha shara jaw tam wa ai rai yang ngai gaw lam re ngu tsun ai Madu Yesu a lam hta hkawm taw nga ai zawn rai tim Madu Yesu hkaw tsun ai shi a tara lam ni anhte hta yawm mat wa nna prat a mawru ngu na ni hte hkrum katut wa na gaw teng sha rai nga ai. Atsawm sha hte hkawm sa lu na matu gaw Madu Yesu hta myit maju jung nga na ahkyak nga ai. Madu Yesu du sa wa na hpe hkap tau ala dingda ai hta shawng nnan gaw anhte shinggym masha ni yawng sadi maja ai hte ala dingda nga ra ai. Nat tsadan gaw shinggyim masha yawng a lu tawn da ai hkye hkrang la ai chyeju ngu na hpe jahten kau lu na matu galoi mung shakut shaja nga ai wa rai nga ai. Hkau na galaw sha ai ni a prat hpe yu dat ga nga yang shaning ting shanhte shakut shaja da ai hkai nmai ni gaw dan la na ten hta e atsawm sha mu la lu na matu sadi sahka hte galaw ra ai rai nga ai.
Dai hte maren sha anhte a prat ting e tam mahkawng wa ai mai kaja lam ni mahkra gaw si wa maw ai shaloi she ginlut shamat kau ai lam ntai na matu galoi mu akyu hpyi ai hte sadi maja nga ra ga ai.
Lahkawng hta Anhte ni galoi mung akyu hpyi nga na ahkyak ai. Atsawm sha gingdan ai hte hkye hkrang la ai chyeju hpe hkam la lu na matu shakut ai lam hta e anhte maga de na shakut shaja ai lam gaw Madu Yesu hte shingdaw dat yang kachyi mi sha naw rai nga ai. Law malawng gaw Madu Yesu maga de na galaw ya ai lam chyu rai nga ai. Anhte maga de na galaw ai lam kachyi mi sha mi rai rai prat a hkye hkrang la ai lam a matu grai lakyin nga ai. Tsun mayu ai gaw shakut shaja mayu ai lam n nga ai ngu ai rai nga ai. Madu Yesu maga de gaw galoi mung jaw na matu jin jin rai nga ai. Dai zawn shajin da ya ai chyeju hpe hkam la lu na matu shagrit shanem ai myit hte hpyi na ahkyak nga ai.
Masum hta gaw shaning law wa magang Madu Yesu a ntsa e tawn da ai tsawra myit grau grau law htam wa na ra nga ai. Karai Kasang a ntsa tinang a tsawra myit hpe tsawra ai lam hpe madun na matu ni nawn ai masha shagu hpe tsawra myit madun ai hku nna n gun mi alu madun mai nga ai. Anhte a tsawra myit mung lani hte lani jet ai tsawra myit rai wa na mung ahkyak nga ai.
Mali hta e gaw sadi dung ai hte shi madu ap jaw ai amu magam ni hpe kang kang ka ka sharawng awng ai hte gun hpai na ahkyak nga ai. Htesa 2 3:12 hta shingrai nga ai ni gaw amu bungli angwi sha galaw nna tinang a shat sha nga mu ga ngu nna Madu Hkristu hta e anhte htet da ai hte shadut jahkat ga ai.
Hkye hkrang la ai lam lu na matu kaja dik lam gaw Karai Kasang sharawng awng ai lam hpe kangka sadi dung ai hte gun hpai ai lam rai nga ai. Karai Kasang a sharawng awng ai lam gaw anhte a lu sha n gun tai na ahkyak nga ai.
Ndai Du Sa Ladaw hta hkan sa na matu hpyi shawn nga ai lam gaw hkye hkrang la ai lam de du na matu n kaja ai lai kyang ni hpe galai shai na matu rai nga ai. Mk 1: 15 dai aten ladaw dik wa ai hte Karai Kasang a mungdan gaw ni wa magang ra ai, myit malai lu nna dai kabu gara shiga hpe kam sham nga mu. Karai Kasang a kabu gara shiga hpe hkaw dan mu ai.
Shiga madat nu wa hpu nau ni yawng Karai Kasang hpe tsawra hkungga nna Karai Kasang a mungga hpe mu mada hkap la lu ai ni rai nga myit ga yawng hpe Karai Kasang shaman ya u ga.
Akyu hpyi saga Oh Hpan Madu Karai Kasang e chyeju mahakra a matu chyeju dum ai hte nang wa hpe grau nna kam sham tsawra chye chyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit nyan marai hte n gun atsam chyeju ni hpe mung jaw ya rit anhte a Madu Hkristu a marang e hpyi nem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Du Sa Ladaw langai rai nga ai. Hti ang ai ja chyum mungga ni gaw chyum mungga daw langai Yeremia a laika 33: 14-16 .chyum mungga daw lahkawng 1 Tesaloni laika 3: 12-4: 2 kabu gara shiga Lk 21: 25-28, 34-36
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
