“Hkum hkrit myit, yu mu, masha nlang a matu na chying kabu mai ai shiga ngai nanhte kaw gun sa rin ngai”
Isaiah 9:1-7: “Nsin hta hkawm nga ai amyu gaw, nhtoi kaba mu lu ma ai.”
Titus 2:11-14: “Karai kasang a chyeju gaw dan pru wa sai rai nna, masha yawng hpe hkyehkrang la ai lam hpaw wa sai.”
Luke 2:1-14: “Hkum hkrit myit, yu mu, masha nlang a matu na chying kabu mai ai shiga ngai nanhte kaw gun sa rin ngai.”
Tsawra ai Nu Wa Hpu Nau ni,
Ngwi pyaw ai Christmas rai u ga! Christmas a kabu gara ai myit mada lam gaw nanhte a matu shamai shatsai ya ai lam shabyin ya u ga. Lai wa sai shaning 2000 ning jan daram hta, myit mada lam htoi san shagan kaba Bethlehem hta da pru lai wa sai, dai lam ni hpe bai myit dum na matu dai ni anhte jawm hpawng nga ga ai. Ru ai yak ai lam ni law law a lapran Madu Yesu shangai wa ai. Lama na dai ni na anhte a prat aten hta Madu Yesu shangai wa ra ai rai yang, sut su nga mai ai mungdan hta shangai wa na matu shi lata la na n rai. Anhte a hpyen yen tsin yam dabang ni hta she shi shangai wa na rai nga ai. Hpa majaw nga yang anhte a tsin yam lam ni hpe gam garan gun la na matu she shi shangai wa ai rai nga ai.
Dai ni anhte hpawng nga ai lam gaw poi galaw na matu san san sha nrai, myit mada lam kaba hte jawm hpawng nga ga ai lam rai nga ai. Anhte a makaw grup yin hta, nji nmu lam ni, gasat gala majan byin ai lam ni, kaw si hpang gara hkrum ai lam ni, shada da adip arip di hkat ai lam ni, ndai zawn re ai tsin yam lam ni law law nga nga ai. Myit daw myit hten hpa nsin hta hkawm nga ra ai zawn rai nga ga ai.
Shinggyim masha ni a prat gaw, laru hte hka leng ni hta nga ai panglai kata de kabai bang hkrum ai zawn rai nga ai. Hkrit hpa hkaleng kaba ni gaw anhte a sang hpaw li ni hpe gayat agrawp jahten kau wa na zawn rai nga ai. Tsadan wa she mungkan ga hpe up sha nga sam sai, ngu nna hkam sha nga ai ni mung law law nga nga ma ai. Grau sung ai shara de anhte shinggyim masha ni hpe woi bang jahten kau nga ai zawn hkam sha nga ma ai.
Raitimung, nbung laru ni hta grau n gun ja ai tengman ai lam hpe hkaw tsun na matu, dai na ngai nang kaw du nga nngai. Nsin ngu ai gaw htani htana nga nga ai baw n rai, sam ram nhtoi htoi san wa na hpe dai nsin shingdang da lu na n rai. Gade galu la ai shana nsin rai tim, nhtoi htoi wa ai aten dai nsin gaw htum mat na rai nga ai. Lai wa sai shaning 2000 ning jan daram hta, masha kadai nau n chye ai, ndan nleng ai Bethlehem ngu ai mare hta, nhtoi gaw mungkan ga de shangai shang wa sai. Dai nhtoi hpe hpa hte mung shamyit kau lu na nrai.
Htat la ai nsin a lapran, lamu kasa ni ndau shana dat ai shiga gaw: “Hkum hkrit mu, yu mu, masha nlang a matu na chying kabu mai ai shiga ngai nanhte kaw du sa rin ngai.” Kabu mai dik ai shiga nan rai nga ai. Dai ni anhte yawng na mayu nga ai mungga gaw ndai mungga nan rai nga ai. Anhte a myu sha ni a matu kaba mai shiga bai shabyin ya nga ga.
- Nsin krung shingnip
Dai na anhte na la nga ai ja chyum mungga ni gaw anhte a ningma ni hpe tsi shamai ya ai tsi ni zawn rai nga ai. Nji nmu hkrum nga ai shinggyim masha ni hpe Karai Kasang a tsawra ai lam hpe tsun shaga nga ai lam ni rai nga ai.
Isaiah 9:1 hta, “Nsin hta hkawm nga ai amyu gaw, nhtoi kaba mu lu ma ai; si hkrung si htan mung na shingnip kata e shanu nga ai ni a ntsa e, nhtoi dawng pru wa sai.”
Tsawra ai hpu nau ni, anhte a mungkan gaw htap la ai nsin kata hta rawng nga ai masa zawn rai nga ai. Nsin hkrung kata hta anhte sak hkrung nga pra nga ra ai zawn rai nga ai. Nji nmu, hkrit tsang hpa lam, kaw si hpang gara ngu ai tsinyam nsin krung hta shanu nga ra nga ga ai. Krung ngu ai gaw, tsaw ai bum lahkawng a lapran na nem ai shara rai nga ai.
Si hkrung si htan nsin shingnip kata e chyat rawng nga ra ai zawn nga hkam sha nga na re. Raitimung, shawng de sit nawt hkawm sa nga ai lam hpe nmai jahkring kau nga ai, matut hkawm sa nga ra ai. Hpa majaw nga yang, krung a maga mi de myit mada shara ngu ai bum nga nga ai.
Nsin hta hkawm nga ai amyu gaw, nhtoi kaba mu lu ma ai; si hkrung si htan mung na shingnip kata e shanu nga ai ni a ntsa e, nhtoi dawng pru wa sai, nsin krung hta nhtoi dawng pru wa sai, nga nna myi htoi Isaiah tsun ai.
- Karai Kasang a chyeju gaw marang htu ai zawn anhte yawng a ntsa e hkrat wa sai
Titu hpang de shagun dat ai laika hta Kasa Pawlu anhte hpe shadum ai lam gaw, “Karai Kasang a chyeju gaw dan pru wa sai rai nna, masha yawng hpe hkyehkrang la ai lam hpaw wa sai. (Titu 2:11)
Karai Kasang a shaman chyeju ni marang htu ai zawn sumsing lamu de nna anhte a ntsa de ru hkrat wa ai lam hpe mi di da nna jahkring mi shingran yu yu ga. Marang gaw lachyen gyinghka ai lam nnga ai sha yawng a ntsa e htu ya ai, lu su matsan, arawng aya lu ai nlu ai, kadai hpe mung n gying hka ai sha yawng a ntsa e htu ai. Bu htawt tsinyam hkrum masha ni a ntsa e htu ai zawn, myu mare hkan nga ai ni a ntsa e mung htu ai, anhte yawng a ntsa e htu ai. Hkun hkraw ai anhte a masin salum ni hta htu ya nna, anhte a masin salum ni hpe madi wa shangun ai hte asak nnan prut tu wa shangun ai.
Dai rai yang, ndai anhte a ntsa de htu hkrat wa ai Karai Kasang a shaman chyeju ni gaw hpa lam ni hpe shabyin ya nga ai kun? Myit daw myit hten ai ngu ai lam ni kaw nna myit mada lam ngu ai de gayin wa na matu anhte hpe sharin ya ai. Anhte hpe myit ga garan shangun lam shabyin ai nju ndawng lam ni hpe koi kau na matu anhte hpe sharin ya ai. Myit hkrum kahkyin wa lam hta hkawm sa na matu sharin ya ai. Hkrit tsang lam ngu ai hpe ningdang kau nna myit mada lam ngu ai hpe jum tek da chye na matu sharin ya ai.
Karai Kasang a shaman chyeju anhte a ntsa htu hkrat bun shangun nna dai chyeju ni hte madi hkam la mayu ga ai kun? Ngu nna dai na nanhte hpe san mayu nngai. Anhte a myit daw myit hten lam ngu ai n hpun ni hpe dai chyeju marang ni hte kashin kau nna, simsa lam ngu ai nli tum hpe tu kaba wa shangun mayu ga ai kun?
- Garen gari Sagu rem ni
Dai prat na sagu rem ni ngu ai gaw, kadai masha nsawn ai, hpa manu shadan nhkrum ai, matsan mayan re ai ni rai ma ai. Maren shinggan hkan nga nna, katsi katsang garen gari rai, sagu ni hpe rem sin ai ni rai ma ai.
Raitimung, lamu kasa shiga shana na matu du sa wa ai gaw, arawng aya ni hte tu kabrin ai hkawhkam hkawseng ni hkan nrai, matsan mayan re ai sagu rem ni shanu nga ai shara hta she rai nga ai. Lamu kasa ni a nsen gaw dai shanhte a simsa ai shana hta ngoi pru was ai: Lamu kasa ni ndau shana dat ai lam gaw “ Hkum hkrit mu, yu mu, masha nlang a matu na chying kabu mai ai shiga ngai nanhte kaw du sa rin ngai.” Karai Kasang kabu mai ai shiga gaw, matsan mayan re ai ni a matu re, ngu ai lam hpe sagu rem ni shadum ya nga ai. Karai Kasang kabu mai ai shiga gaw hpyen yen camp ni hkan nga ai ni a matu re, kaw si ai majaw hkrap nga ai ma ni a matu re, prat laru hta lu malu yawng sum shamat kau sai kun dinghku ni a matu re. Hpu Nau ni e, Karai Kasang kabu mai ai shiga gaw nanhte a matu rai nga ai. Kara shara kaw mi du nga ai rai tim, masha ni yawng e kabai da hkrum nga ai rai tim, nanhte a matu rai nga ai. Nanhte hkum nan mung kabu mai ai shiga rai nga ai. Yu maya masha ni gun sa ya ai kabu gara ai shiga a marang e mungkan ga hpe shgamai shatsai ya lu nga ai.
- U shat wa kang: Myit mada lam a tingnyang
U sha wa kang a lam hpe mung sumru yu ga. HKawhkam ni a hkawhkam wa, Madu gaw u shat wa kang hta shangai wa ai. Makau grup yin hta dusat ni sha nga nga ai. Ndai lam gaw anhte hpe hpa lam nit sun shadum ya nga ai kun?
Karai Kasang gaw anhte hkrum nga ai nji nmu tsinyam lam ni hte tsang gang nga ai n rai, ngu ai lam hpe shadum yan ga ai.
Ja hte mawn sumli da ai hkyik hkam ai tingnyang hta dung nna anhte hpe up hkang na matu shi du sa ai nrai, shinggyim msaha ni a tsinyan lam ni hpe gun la ya na matu she shi du sa ai rai nga ai . U shat wa kang hta shangai wa ai lam gaw, “nanhte a matsan mayan tsin yam lam ni hta ngai rau rai nga nngai, nanthe hkrum nga ai nji nmu lam ni hte ngai rau rai nga nngai” ngu nna Karai Kasang tsun ai lam rai nga ai.
U shat wa kang hta shangai wa nna mungkan ga hpe hkye hkrang la ai lam jaw ya lu ai Madu gaw, hpyen yen tsin yam dabang ni hta shanu nga ai ni hpe myit mada lam la sa ya lu na teng sha rai nga ai. Sagu rem ni hpang de simsa lam hpe gun sa ya lu ai Madu gaw, nju nmu hkrum nga ai anhte a masin salum ni hpe mung simsa lam jaw ya lu na rai nga ai.
- Kabu gara shiga shachyam shabra ai kasa ni tai ra ai
Lamu kasa ni sagu rem ni hpang de shiga sa htawn shana ya ai, raitim mung shiga htawn shana ai lam gaw dai kaw sha ngut mat ai nrai, sagu rem ni mung shiga htawn shana ai masha ni bai tai wa ai, hkrum ai masha ni yawng hpe dai kabu gara ai shiga tsun shana ya lam sagu rem ni galaw lai wa ma ai. Ya ndai shiga htawn shana ai magam lit gaw anhte galaw ra na lam rai nga ai. Anhte gaw dai ni na prat a lamu kasa ni rai nga ga ai.
Nji nmu yu yak kyin dut lam ni law law hkrum nga ai dai ni na mungkan hpe myit mada lam hkaw tsun shana na gaw dai ni anhte galaw ra na lit magam nan rai nga ai.
- Kaw si hpang gara hkrum nga ai ni hpe matsan dum lama ai lam hte malu masha sha jaw gam garam lam galaw ya na;
- Tinang a dum nta buga kaw nna hprawng yen hkawm nga ai ni hpe shingbyin shara jaw ya ai na, shanhte a sari sadang hpe manu shadan ya ai lam ni galaw ya na;
- Myit hkrit myit tsang hkrum nga ai ni hpe simsa ai lam jaw ya ai n gun jaw mungga tsun shaga lam galaw ya na;
- Myit daw nyit hten hkrum nga ai ni hpe Karai Kasang tsawra nga ai ngu ai myit mada lam tsun shana ya na; ndai lam ni hpe anhte galaw ra na ga ai.
Madu Yesu a nhtoi hte mungkna ga hpe anhte jahtoi ya ai lam galaw nga ga ai rai yang, anhte gaw ahkrung nga ai Madu Yesu a mungga tai wa ga ai.
- Samram nhtoi htoi san wa ra ai
Nsin ngu ai gaw htani htana sin nga na nrai, ngu ai lam hpe myit dum shangun mayu nngai. Dai nsin hpe nhtoi gaw teng sha dang shamyit kaw na ra ai.
Mungkan a nsin galu hpe shamyit kau ai gaw Christmas rai nga ai. Simsa lam ngu ai gaw teng sha byin mai ai, nju ndawng lam hta tsawra lam gaw grau n gun kaba nga ai, Madu Yesu a nhtoi hpe hpa lam hte mung shamyit kaw lu na n rai, ngu ai lam hpe Karai Kasang hkum nan ndau shana ai lam gaw Christmas rai nga ai.
“Matsaw lahta tang e, Karai Kasang gaw hpung shingkang rawng nga u ga, ga ntsa e mung, shi sharawng awng ai masha ni hta, ngwi pyaw ai gaw anga nga u ga law” (Lk 2:24) ngu nna lamu kasa ni hte raw mahkawn shakawn nga ga.
Pilgrims of Hope in the Jubilee Spirit
Christmas poi hpe galaw nga ai ndai aten hta, Wa Sarabyin Francis a Jubilee mungga hpe mung myit dum nga ga. Wa sarabyin tsun shadum ai hta, “anhte gaw myit daw myit hten ai myit ni hte nrai, myit mada lam hte she bu hkawm nga ai ni rai ga ai, tsinyam lam ni law la ai mungkan ga hta, makam masham nhtoi hte jahpring da ai msin salum hte hkawm sa nga ga. Ma Yesu hpe sa nawku na matu myit mada lam kaba hte pru hkawm sa wa ai sagu rem ni zawn, anhte a hkristan prat hkrun lam mung myit mada lam hte hkawm sa nga ai hkrun lam rai ra ai. Karai kasang a tsawra ai lam gaw tengman ai lam re, Karai kasang gaw sadi dung ai wa rai nga ai, ngu ai lam ni hpe masin salum hta bang da let hkawm sa nga ra ai.”
U shat wa kang hta Madu Yesu shangai wa ai, ngu ai lam gaw labau hta byin lai wa sai mabyin lam san san sha nrai, dai mabyin hta anhte yawng shang lawm na matu aten shagu anhte hpe saw shaga nga ai lam she rai nga ai. Nsin kaw nna nhtoi de pru wa na matu, hkrit tsang ai prat kaw nna Karai kasang hpe kam hpa manghoi manat nga ai prat de, myit ga garan shangun ai lam ni kaw nna myit hkrum gahkyin ai ai lam de, sit sa wa na matu saw shaga ai lam rai nga ai.
Christmas a kabu mai ai shiga hpe tsinyam hkrum hpyen yen dabang ni de, tsin yam hkrum masha ni hpang de, kaw si hpang gara hkrum nga ai masha ni hpang de, htawn tsun shana ai magam lam hta hkawm sa na matu dai na anhte hpe Madu saw shaga nga ai. Karai Kasang gaw nahte hte rau rai nga ai majaw simsa lam hpe shabyin na matu teng sha byin mai nga ai. Lamu kasa ni the rau kabu gara mahkawn shakawn let hkawm sa wa ga.
Jahtum hpung dim hku nna, tsawra ai hpu nau ni e, myit mada lam tawn da nga ga ngu nna saw shaga mayu nngai. Madu Yesu hpe u shat wa kang hta hkrum lu hkra shakut ga ngu nna n gun jaw saw shaga mayu nngai. Shi Madu a nhtoi gaw nanhte a nsin hta htoi tun ga u ga. Madu a shaman chyeju the kabu gara shiga htawn tsun shana ai kasa ni nanhte tai wa myit ga. Anhte a mungdan a matu matut nna akyu hpyi ga. Masha law law anhte akyu hpyi ya na hpe ra kadawn nga ma ai. Anhte a mungdan a matu kabu gara shiga htawn shana ya ai lamu kasa ni anhte tai nga ga law.
Merry Christmas! Ngwi pyaw ai Christmas rai u ga! Shangai wa sai simsa lam Madu hkawhkam gaw nanhte masin salum ni hpe up hkang ya nga u ga!
