Karai Kasang Grau Nna Jai Lang U Ga!
Ya aten Italy Mungdan Roma kaw hpaji sharin hkam la nga ai Brother Joseph Madawk Doi San gaw Wa Sarabyin Francis a Christmas shani Mungkan ting hpe shaman ai ( Urbi et Orbi ) lamang hta Wa Sarabyin a tara tau hku nna shang lawm lu ai hpe mu lu ga ai majaw grai kabu arawng la ga ai.
Urbi Orbi ngu ai gaw Wa Sarabyin hku nna mungkan ting hpe laksan shaman ya ai rai nga ai.
Ndai hpe Nawku Hpung a ahkyak dik poi nhtoi ni rai nga ai Christmas poi hta kalang, Paska Poi hta kalang hte Sarabyin lata hkrum ai shaloi kalang masum lang sha galaw laksan lamang re lam Brother Joseph Madawk Doi San tsun dan ai kaw na chye lu ai.
Brother Joseph Madawk Doi San gaw Myitkyina Saradaw Sasana, Hpakant jau ginwang kaw na rai nna, jau tai na matu shakut nga let ya aten Italy Mungdan, Roma kaw hpaji sharin hkaja la taw ai Brother rai nga ai. Ya na zawn Wunpawng Brother langai mi Wa Sarabyin a makau kaw nga let tara tau na ahkaw ahkawng lu ai anhte Wunpawng buga de nga ai nawku hpung masha ni a matu kabu n’gun lu hpa labau shang lam mung rai nga mali ai.
Bro. hpe Karai Kasang grau nna jai lang nga u ga!
