Daini na madu a kabu gara ai shiga hpe hti sum ru yu ai shaloi e, shingyim masha shagu gaw tinang a prat galu kaba rawt jat wa na matu, laili laika hpaji ni hpe aten jaw nna, sharin hka ja la, hti matsing sum hting la nna, awng dang galu kaba ai, gumhkawng ai, masha byin wa hkra shani shagu shakut hkawm sa ni chyu sha rai nga ga ai.
Dai zawn sha tinang a makam masham wenyi lam ni hpe mung, grau galu kaba wa hkra madu Karai Kasang a lam yan hpe, shani shagu hti sumru hka ja shakut sa ra ga ai. Dai majaw Karai Kasang a lam hpe chye na matu gaw, shi a mungga hpe hti ra ai. Shingrai mungga n hti ai wa gaw, Karai Kasang a lam ni hpe chye na yak nga ai nga nna, St.Jerome ja ja tsun shadum da sai. Dai majaw shiga madat nga ai nu wa hpu nau ni yawng hte e, Karai Kasang ngu ai wa gaw kadai wa re? Hpa majaw shingyim masha gaw, Karai Kasang hpe kamhpa matut mahkai ra nga a ta? Ngu ai lam mahkra chye chyang la lu na matu Karai mungga shing nrai Ja chyum laika hpe hti ra ga ai. Shingrai Karai Kasang a n htoi hta sak hkrung nga sa lu na matu shani shagu Karai a mungga hti let nga pra sa ga law.
