Daini na Ja Chyum Mungga hpe hti sum ru yu ai shaloi, Madu Yesu gaw Muk tawng manga hte Nga lahkawng hpe shalaw shahtam ya nna, masha law law hpe hkru kat hkra jaw sha ai lam anhte hpe bai sum ru shangun nga ai re. Ndai Ja chyum mung ga hpe e anhte ni lang law law wa na ga sai rai nga ai. Dai ni anhte hpe bai shadum ya ai lam gaw, Karai Kasang n dang di lu ai lam hpa n nga ai ngu ai hpe shadum ya ai.
Ahkyak ai gaw anhte a kam sham myit sha madung re ai hpe, mung madi madun ya nga ai. Shinggyim masha a atsam Bawnu hte n myit sawn lu ai lam ni, n dang di lu ai lam yan ni mahkra hpe shi madu dangdi lu nga ai. Shingrai nu wa hpu nau ni, Madu Yesu tsun ai gaw, nanhte a kam sham ai myit Chying Hkrang tum daram nga ai rai yang, bum hpe htaw panglai de sit u ngu yang, sit mat wa ai nga nna, tsun shadum sai hte maren, matut na, Madu Karai Kasang kaw kamsham ai myit n’gun atsam ni law htam wa hkra, wenyi lam hta grau na, shakut hkawm saw a ga law.
