“Dai lam ni Yesu tsun nga ninglen, lamu de mada yu nna, “Wa e, nye ahkying du sali ai: ngai nsha wa a lata de nang ap ya ai yawng mayawng hpe shi htani htana asak jaw nga u ga, hkrung mahkrung a ntsa e up ai ahkang aya nang shi hpe jaw nit dai hte maren, ngai nsha wa e na a hpung shingkang shapraw ya lu n ga, nsha wa a hpung shingkang hpe mung, shapraw ya e law.”
John 17:1-2 gaw chyum laika yawng hta na lachym numnak rawng dik ai chyum daw ni hta na langai mi rai nga ai. Madu Yesu Kawa Karai Kasang hpe tsun ai hta, “Wa e, nye ahkying du sali ai: ngai nsha wa a lata de nang ap ya ai yawng mayawng hpe shi htani htana asak jaw nga u ga, hkrung mahkrung a ntsa e up ai ahkang aya nang shi hpe jaw nit dai hte maren, ngai nsha wa e na a hpung shingkang shapraw ya lu n ga, nsha wa a hpung shingkang hpe mung, shapraw ya e law.”
Madu Yesu gaw, Shi dinghta ga ntsa e nga na aten htum magang wa sai hpe dum chye nga ai. Kawa Karai Kasang hte Shi hpe hkap la kamsham ai ni yawng hpe bai matut gahkyin lu na matu, shi a sak hpe ap nawng jaw ya ra na lam hpe Shi dum chye nga ai.
Kabu hpa shiga gaw, Kawa gaw, ‘hkumshan hte hpan da ai yawng a n-tsa Up hkang/ dawdan na ahkang aya” hpe Kasha hpe jaw da nga ai. Anhte yawng gaw, Mungkan masha yawng a Hkawhkam rai nga ai, dai teng man ai Madu hpe daw jau ai ni rai nga ga ai. Madu Yesu gaw Mungkan ting a Hkawhkam rai nga ai. Shi si hkam ai a marang e, Mungkan masha ni yawng asak hkrung lu na matu Shi hpe Mungkan ga de shangun dat na hpe Kawa Karai Kasang kaw hpyi ai. Anhte a Hkawhkam wa Madu Yesu gaw, Mungkan Masha ni Shi a matsan dum lama ai myit hte n-ging dan ga ai raitim mung, sharawng awng ai myit kaba hte Shi a asak hpe anhte a matu jaw ya sai.
Kolose1:15-20;
Shi gaw myi e n mu lu ai Karai Kasang a hkrang bung sumla rai nga ai hte, hpan da ai arai yawng mayawng hta alat rai nga ai. Kaning rai nme law, sumsing lamu hte ginding aga hta yawng mayawng hte gaw, mu lu ai hte n mu lu ai hte hpe rai ti mung, hpa hkawhkam tingnyang, munggyi aya, du aya hte ahkang aya hte hpe rai ti mung, shi hta e hpan tawn da nga sai; arai yawng mayawng gaw, shi a jaw e mung, shi a matu mara mung, hpan tawn da nga sai. Shi gaw yawng mayawng a shawng na rai nga ai hte, yawng mayawng gaw shi a majaw grin nga ai. Dai Hpung ngu ai hkumhkrang a baw, shi rai nga ai. Shi nan lam shagu hta grau ai nhtung nhka tai wa u ga, shi gaw npawt nhpang hte si mat ai ni kaw na alat ningshawng rai nga ai. Kaning rai nme law, shi hta e hkum dinghkum rawng nga u ga, Kawa gaw sharawng awng nga ai rai nna, shi a wudang na hkaw ai asai hte mahku mara shatai let, shi a lata e yawng hte hpe shi hkum hte htinglu htinglai ya nga ai: rai sa, sumsing lamu e nga ai hte hpe rai ti mung, ginding aga e nga ai hte hpe rai ti mung, shi a lata hte htinglu htinglai ya nga ai.
Kolose hpung masha ni hpang de San Pawlu shagun dat ai laika 2:13-15, hta
“Nanhte gaw tara tawt lai nna, nanhte a hkum shan a matu gadoi n hkam ai hte chyasi ni rai nga myit ti mung, shi gaw nanhte hpe shi hte rau jahkrung ya manit dai. Anhte a shut hpyit ai yawng mayawng hte hpe shi raw dat kau ya nna, anhte hte nhtan shai ai htet da ai ga rawng ai, anhte hpe jeyang ai lata lahpan hpe katsut kau ya nu ai; wudang hta e dai hpe dit shakap let shi dai hpe yeng seng kau nu ai. Du aya hte ahkang aya lu ai hte hpe htawk jahkrat kau nhtawm, shi dai ni hpe leng leng mahtan tawn nna, dai wudang hta shanhte a ntsa e padang nlaw da mu ai.”
Ahkaw ahkawng yawng hte matsan dum lama ai myit ni hpring nga ai, Reng grau htum ai Hkawhkam wa hpe anhte daw jau ai lam gaw, anhte a matu hpa lachyum nga nga ai kun? Lama na, anhte a asak prat yawng hpe Shi Madu a Up-hkang npu hta asan sha anhte ap jaw da ga yang, anhte a asak prat ni gara hku rai na kun? Hpan da mada yawng hte gaw Karai Kasang a mying ning sang hpe madi madun ai nga ma ai. Shing gyim Masha baw sang yawng hte mung lani mi na nhtoi hta e Karai Kasang a man e ding-nyawm dagup nga na ma ai. Raitim, lama na dai ni jang, na a myit hpe daw dan nna Shi Madu hpe hkam la let, na a asak aprat hpe sharawng awng ai myit kaba hte Shi hpe ap kau yang, Na a Asak Prat gara hku rai wa na kun? Dai Madu hpe, Na a prat, yaw-shada lam ni, N-gun atsam ni, Hkam sha nga ai lam ni, masha ni hte kanawn măzum ai lam ni, Ja Gumhpraw sut gan ni, lai sai ten na na a prat-labau ni hte rau du na ra ai prat a shawng lam yawng hpe Hparan ya na Hkawhkam aya Shi hpe jaw kau yang, Na a asak prat gara hku rai na kun? Anhte Kadai mung tinang asak aprat a Hkawhkam tai nga na matu Hpan da hkrum ai ni n-rai ga ai. Madu Yesu hpe anhte a asak Madu hku nna hkam la na lit magam hta lai nna kaga lit magam hpe gun hpai na matu mung anhte hpe hpan da nga ai n-rai. Na a myit-sawn lam, tsun-shaga, galaw sa ai lam yawng hkra hpe Karai Kasang a Myit-sawn, tsun-shaga, galaw sa ai lam ni hta ap da ga ai n-rai yang gaw, tengman ai Simsa lam, myit pyaw lam, yaw shada lam ni hte teng man ai tsawra myit ni hpe galoi mung chye na lu na ga ai n rai.
HTANI HTANA ASAK LU NA MYIT MADA SHINGRAN
Shi gaw yawng mayawng hpe tinang a ahkying aten hte htuk tsawm ai hku galaw da nu ai: shinggyim masha hpe htani htana prat dingsa nga nga na ma rit shangun ti mung, shi gaw Karai Kasang hpajang da ai magam bungli hpe npawt ndung hkren gawn yu lu ai n rai. (Hpangji Ningli 3:11)
Kaja wa yaw shada lam nga ai masha langai byin lu na matu gaw, ting nang a asak prat hpe Htani htana grin nga ai nhtoi hta asak hkrung hkawm ra nga ai. Tengman ai hte htani htana grin ai asak a lam hpe hpaw madun tsun da ai lam nnga yang, shing gyim masha a prat gaw bandung nnga, Myit mada shara mung nnga, Majoi wam dam hkawm ai a prat sha rai mat na re. Tinang a prat a yaw-shada lam hpe kaja wa mu chye lu yang sha she, ndai prat a mabyin hkrun lam ni hpe atsawm sha, jaw kaja ai hku anhte mũ mada lu na ga ai.
Hpangji Ningli 3:11, hta tsun da ai gaw;
Shi gaw yawng mayawng hpe tinang a ahkying aten hte htuk tsawm ai hku galaw da nu ai: shinggyim masha hpe htani htana prat dingsa nga nga na ma rit shangun ti mung, shi gaw Karai Kasang hpajang da ai magam bungli hpe npawt ndung hkren gawn yu lu ai n rai.
Htani Htana asak hpe yu mada lu na matu gaw anhte hta Kam Sham ai Myit Rawng ra nga ai. Shing gyim prat gaw n grin ai: Asak a prat hpe, “Hpang ai /Ngut mat ai, Shangai ai / Si ai,” ngu ai lam ni hte masat ga ai. Raitim, Chyum laika hta Karai Kasang gaw Asak jaw ya lu ai wa hte si-hkrung, si-htan hpe dang kau lu ai wa re hpe anhte hka ja la lu ga ai. Madu Yesu hta anhte yawng gaw, htani htana asak hte Hpan Madu Karai Kasang hpe makoi magap da ai lam nnga, rau sha jawm pawng nga lu na lam hpe anhte chye la lu sa ga ai.
Htani Htana asak hpe Myit shing ran nna asak hkrung ai lam gaw, yawng mayawng hte hpe shanhte byin nga ai hku sha byin nga na nre, ngủ ai hpe myit kam ai hte ndai prat na asak hpe, hpang na prat a matu jasum kau ai lam rai nga ai. Anhte a myit dik lam hpe, ndai Mungkan arung arai ni hta sha tam ga ai rai yang, Sumsing mungdan ngu ai nnga ai zawn, Karai Kasang gaw, anhte yawng Madu Yesu a marang e Sumsing Mungdan de shang lu na n lajang da ai zawn rai na re. Mungkan ga na arung arai ni gaw mai kaja ai kumhpa hpe jaw ya lu ai wa hta chyu sha manu dan nga ai. Dai majaw, anhte lu ai sutgan, shada ganawn mazum lam, hte bungli magam lam ni gaw manu dan nga ai. Hpa majaw nga yang, dai ni gaw yawng mayawng hte hpe nnan bai galaw ai shaloi byin wa na lam ni a, shingnang ni rai nga ma ai.
Htani htana asak hpe myit shingran nna asak hkrung ai gaw, anhte hpe ndai prat hta lam shagu hta shadawn sharam, sadi sahka ai hte nga chye lu na lam de woi madun ya nga ai. Myit dik lam nnga, n-grin ai lam ni hta anhte a myit masin n-dun taw ai sha, yawng hpe chye na, hkap la lu ai nga-sat nga-sa ladat de woi sa ya nga ai. Ndai prat hta byin nga ai lam ni gaw, du na ra ai prat hta byin wa na lam ni hte shingdaw yu yang Shing-nyip/shing-nang sha rai nga ai lam hpe dum chye wa yang, tinang a asak prat hpe Karai Kasang jaw ai shaman chyeju ni hte pyaw pyaw nga chye ai sak-hkrung lam a ladat de woi awn la ya ai.
Na a Prat hta e, na a Sut gan, na a kanawn mazum ai lam, na a bungli magam lam ni hta, nang pyaw pyaw rai nga nna, Karai Kasang a hpung shingkang hpe shakawn nga na malai, dai Sut gan, kawnawn mazum lam ni hte bungli magam lam ni mahtang she Nang hpe Madu tai taw ai zawn, hkam sha yu ga ai kun? Mungkan sut gan lam ni hta hkum-tsup/hpring-tsup ai myit dik lam hpe lu la na Nang shakut tam taw nga ai kun? Shing nrai, Sumsing Mungdan lam hpe myit mada let Nang Myit Simsa lam lu sai kun? Dai ni, Akyu hpyi let, Na a prat hpe Madu Yesu hta kalang mi bai ap da u. Karai Kasang gaw, na a masin- salum hpe masu, hkalem nga ai Mungkan ga a myit marin marit ai lam yawng hpe dang-di kau ya u ga, Shi Madu hpe nang ahkaw ahkawng jaw dat u.
