Daini na Ja Chyum Mungga hpe hti sumru yu ai shaloi e, Madu Yesu a nta masha ni gaw kaning re ai ni rai nga ai hpe tsun dan ai lam anhte na lu nga ga ai. Yesu gaw nawku htingnu a kata e tara sara ni hte shawa hpawng a man hta, kabu gara shiga hkaw tsun nga yang, shinggan e shi a kanu hte hpu nau ni sa du nna shi hpe sa tam ma ai. Shaloi e Yesu gaw, shi a makau grup yin e dung taw nga ai ni hpe, gayin mada yu let tsun ai gaw, Karai Kasang a ra sharawng ai lam hpe hkan galaw ai ni kadai rai timung, nye a hpu nau na ni hte nye a kanu rai ma ai ngu htan dat nu ai.
Shingrai shiga madat nu wa hpu nau ni yawng e, ndai Ja chyum mungga hta anhte asan sha na lu sai hte maren, shi Madu a tara mungga lam ni hpe, htep lahti hkan sa shakut ra ai lam hpe ja ja tsun shadum lam matsun da nga sai re. Dai majaw shi Madu a kasha majing, anhte ni tai lu na matu gaw, shi ra sharawng ai lam ni hpe hkan sa ra ga ai. Shaloi jang shi a nta masha ni, kahpu kanau kana kanu ni tai lu na teng sha rai nga ga ai. Dai re majaw anhte ni yawng, Karai Kasang a man e ten shagu hta, kaja tsawm htap ai prat hte sak hkrung hkawm sa lu hkra, shakut sa nga ga law.
