Masha hpe myit kataw shangun ai Hkristan ni a kam sham ai lam ni law law hta, Chyoi Pra ai hte tsawra chye ai Karai Kasang Wa, Masha a salum hta sa shanu nga ai ngu ai lam gaw kaba dik rai nga ai. Nang hte ngai gaw, Yesu a Sai a marang e, Karai Kasang hte jawm pawng ai madang de du saga ai. Hpa mung anhte hpe shi kaw na n jahka kau lu ai. Shi gaw anhte hte anhte sa ai nsa hta grau ni ai. Anhte kabye da ai aga hta grau teng ai anhte Karai Kasang hte rau jawm pawng nga ai lam hpe Ga shaka Ningnan hta law law mu lu ga ai.
Galati 2:20 hta,
“Ngai gaw Hkristu hte rau Wudang hta jen da ai hkrum nngai. Ngai hkum nan naw hkrung nga nngai n rai, Hkristu gaw ngai hta e ahkrung nga ai; ya e dai hkum shan hta ngai hkrung nga nngai gaw, ngai hpe tsawra nna, nye a matu mara shi hkum dai shi ap kau ai Karai Kasang a Kasha a makam masham hta sha ngai hkrung nga nngai” ngu nna San Pawlu tsun da nga ai.
1Kor 6:19-20 hta mung,
“Dai hta n ga, nanhte a hkum hkrang gaw Karai Kasang kaw na nanhte lu la ai hte, nanhte hta e rawng nga ai Chyoi Pra ai Wenyi a htingnu rai nga ai, nanhte n chye nga myit ni? Nanhte gaw tinang hkum hpe pyi up lu ai n rai; Nanhte jahpu manu daw nna mari da sai ni rai nga myit dai; dai re ai majaw, nanhte a hkum hkrang hte Karai Kasang hpe shagrau shaa nga mu law” nga nna shadut nga ai.
Rom 6:4 hta,
“Dai re ai majaw, Hkrisu gaw Kawa a hpung shingkang hte si mat ai ni kaw na hkrung sharawt la ai hkrum wu ai hte maren, anhte mung asak sumdam ningnan hta e rawt hkawm wa lu hkra, dai baptisma hkam ai hta e, anhte si hkam nna shi hte rau lup makoi ai hkrum saga ai”
Bai, Col 1:27 hta,
“Dai sung htum ai lam chyawm gaw, shi a chyoi pra ai ni hpe ya e shadan dan nu ai; ndai sung htum ai lam a hpung shingkang ngu ai sut gan gaw, maigan masha ni hta hpa rai nga ai gaw, shanhte hpe shadan dan u ga. Karai Kasang gaw ra nga ai; dai gaw, Hkristu gaw nanhte hta e de nga ai hpe, hpung shingkang myit mada ai lam ngu ai rai nga ai” nga nna San Pawlu sharin ya ai.
Nang Karai Kasang hte tsan gang ai ten ngu ai n nga ai, Shi gaw na a kata e nga nga nna, nang hkrum ai ru yak kindut lam ni, awng dang ai, hkrat sum ai lam ni yawng hta nang hte rau arai nga ai.
Shi gaw, na a matu rai nna, nang hpe garum na matu, shani shana, shani shagu jin jin rai nga ai. Anhte shut hpyit mara ni hpe galaw hkrum kau ai ten hta pyi shi anga nga ai.
Anhte Shi hpe gumlang yang pyi, Karai Kasang anhte a kata e nga nga ai. Anhte mahtang galaw ra ai gaw, Karai Kasang hte rau jawm pawng nga ai lam hpe anhte a sak hkrung shamu shamawt ai lam shagu hta bra wa hkra sharin shaman la ra ga ai.
Anhte hkye hkrang la hkrum ai amu hpe tatut hkrang shapraw na matu, lai sai ten na n kaja ai lailen ni hpe kau da nna, Hkristu Madu hte rau jawm pawng ai sak hkrung lam ningnan hpe sharin la ra ga ai.
Anhte a sak hkrung lam hpe Karai Kasang hte hkrum zup ai lam hta daju ka-ang da na rai yang gaw, Shi anhte hte rau nga nga sai lam hpe yin la ra ga ai.
Shi gaw, anhte Shi hte hkrum mayu ai shaloi, Sumsing ting-nyang kaw nna dasang yu sa wa ra hkra re ai, anhte hte grai tsan ai kaw nga ai Karai Kasang n re.
Nawku Jawng hkan, Shawa hpawng hkan, nawku daw jau hpawng hkan, Jau, Saradaw ni hte sha nga ai Karai Kasang n rai nga ai.
Shi gaw, na a kraw kata e shanu nga nna, nang hpe tsawra nna, nang hte tut e rau kanawn mazum pawng nga na hpe marit nga ai. Dai majaw, nang Karai Kasang hte rau pawng nga ai lam hpe dinglik yu na matu ya aten loi la ga.
Nang “asak ningnan hta bai hkawm sa lu na matu”, Shi nang hte rau ni htep nga ai hpe madun rit, ngu nna hpyi u.
Rom 6:4 hta ning nga tsun da ai: “Dai re ai majaw, Hkristu gaw Kawa a hpung shingkang hte si mat ai ni kaw na hkrung sharawt la ai hkrum wu ai hte maren, anhte mung asak sumdam ningnan hta e, rawt hkawm wa lu hkra dai baptisma hkam la ai hta e, anhte si hkam nna shi hte rau lup makoi ai hkrum saga ai.”
Na a sak hkrung lam jut shagu hta Karai Kasang shang lawm lu hkra, na a myit masin hta shara jaw u. Daini na nhtoi gaw nang hpe tsep kawp galai shai shangun ai nhtoi rai u ga.
Akyu Hpyi ga:
1. Shawng ningnan; nang Karai Kasang hte jawm pawng nga ai lam
hpe sumru yu u. Na a lai wa sai ten na mahkrum madup ni hte
myit hta hkam sha ai lam ni hpe n yu ai sha, Chyum Mungga hta
mahta nna sumru u.
(Gal 2:20) “Ngai gaw Hkristu hte rau Wudang hta jen da ai hkrum nngai. Ngai hkum nan naw hkrung nga nngai n rai, Hkristu gaw ngai hta e a hkrung nga ai: ya e dai hkum shan hta ngai hkrung nga nngai gaw, ngai hpe tsawra nna, nye a matu mara shi hkum dai shi ap kau ai Karai Kasang a Kasaha a makam masham hta sha ngai hkrung nga nngai.”
2. Lahkawng hta:
Na a prat hta, gara shara ni hta gaw Chyoi Pra ai Wenyi hte nang rau n pawng, n ganawn nga ai hpe maram yu u. Gara lam ni hta gaw, Karai Kasang nang hte rau n rai nga ai ngu nna hkam sha ai kun?
Madu Yesu nang hte rau hkawm, jawm pawng nga sai hpe mu mada hkam sha ai kun?
3. Tsang masum ngu na hta, Chyoi Pra ai Wenyi nang hpang de sit sa na matu hpyi nem u.
Tam shakut taw na malai hkap hkam la ai; ba hkam nna shakut si na malai, ban sa la ai masha tai hkra garum ya rit ngu nna hpyi u.
Shakawn 46:10 hta ning nga n-gun jaw da nga ai: “Amu sha nga mu, ngai Karai Kasang rai nga nngai, chye mu, Amyu baw ni hta ngai galu kaba wa nna, Ga ntsa e dan hkung nga na nngai.”
