Kahtawlik Nawku Hpung Myitkyina Sasana hta Saradaw ginwang a lit hkam Saradaw lu na matu ( 4 ) ning daram nawku hpung masha ni akyu hpyi lai wa ai rai yang ( 12 January 2025 ) ya shani gaw lit hkam Saradaw ningnan John Mung Ngawn La Sam lu la sai rai nna daini gaw Myitkyina Saradaw ginwang hta Saradaw ningnan bai lu la ai shata mi hpring sai rai nga ai. Daini du hkra Nawku hpung masha ni a myit masin hta Saradaw ningnan lu ai majaw kabu myit pyaw lam hpe hkam sha lu nga ai. Shata mi na mat sai raitim Saradaw shatai poi gaw mani mana zawn sha hkam sha taw ai nawku hpung masha ni mung law law nga ai hpe chye lu ai.
Saradaw shatai poi hta n sa du lawm lu ai hpung masha ni law law rai nga ai majaw Saradaw shatai poi hte seng ai masat sumla hkrung, video kadun ni hpe RVA magam gun ni kawn shinggyin la lu ai made hpe kalang mi bai lajang mara ya dat lu ga ai. Saradaw shatai poi nsa du lawm lu ai ni mung ndai hpe yu nna Karai Kasang a chyeju hpe shakawn let kabu myit pyaw lam hkam la nga ga.
January shata 11 ya shana de Saradaw shatai poi de du sa wa ai Maigan Mungdan hte Myanmar Mungdan ting na Wa Saradaw ni, Wa Jau, Mama ni hpe madu tai nga ai Wa Saradaw kaba Cardinal hte Wa jau, mama ni, hpung masha ni kaw nna nbungli pa de sa tau la lai wa sai.
Nbungli kaw nna yu wa ai hpang N-gan Jan. Sarama Ja Awng kaw nna alu jaw ai Htunghking maka Jinghpaw Waistcoat palawng hpe hkap jahpun ya sai.
Dai hpang du sa wa ai sumtsan manam ni yawng hpe San Columban Nawku Hitngnu de shawng woi wa ai. Nawku jawng wang de shang wa ai chyinghka lam kaw nna hpung masha ni laprai lahkra tsap nna wunpawng yungwi mahkawn ni hte rau kabu gara hkap tau hkalum la lai wa sai. hkap tau hkalum ai lamang kadun hpe galaw la ai. Nawku jawng kata kaw mung Wunpawng Htunghking, Htawnghkun Nhpye, Chyam N-gang ni hkap jahpye nna hkap tau la sai hpe mu lu ga ai.
Hpang shani January shata 12 ya jahpawt gaw Saradaw shatai poi galaw ai shara Edin San Luka Chyum Hkawlik jawng wang de jahpawt jau jau kaw nna nawku hpung masha unawng uwa rai yen sa wa ai hpe mu lu ai. Poi wang de du shang wa ai shaloi Htunghking bu hpun mawn sumraw nna wunpawng yu ngwi mahkawn ni hte hkap tau hkalum la ai.
Masat da ai aten jahpawt 9 du ai hte rau Saradaw shatai poi Missa Hkungga hpang na matu Wa Saradaw hte wajau ni Misa palawng sang gan hpun nna Missa tawn de hkawm sa wa ai. Dai shani sa du lawm ai Saradaw ni marai ( 20 ) hte Wa jau ni ( 150 ) jan re ai lam chye lu ai.
Missa tawn de du ai hpang Saradaw shatai ai Missa Hkungga hpe galaw hpang sai.
Missa hkungga hta Saradaw shatai ai daw hta du wa ai ten Wa jau kaba Msgr. Dr. Peter Hka Awng Tu kaw nna Msgr. John Mung Ngawn La Sam hpe Saradaw shatai ya na matu Saradaw kaba Cardinal kaw hpyi shawn ai.
Saradaw kaba Cardinal kawn Sarabyin kaw na Saradaw tai na ahkaw ahkang laika lu sai kun san jep nna dai laika hpe madun dan na hte hti dan na matu tsun ai. Dai shaloi Wa Jau kaba Dr. Peter Hka Awng Tu kaw nna Sarabyin ahkaw ahkang laika hpe shawa masha yawng man de shaw madun dan lai wa ai.
Dai hpang Saradaw kaba kawn Saradaw tai na jau hpe ra ai lam ni san jep ai. Saradaw langai a gun hpai ra na lit magam ni hpe tsun dan ngut ai hpang
Shawa masha yawng lahput hput di let Sanpra ai ni a garum hpyi ai Litany hpe tsun nna akyu hpyi ai.
Lahput hput di let san pra ai ni a garum hpyi ai lam galaw nga ai ten Saradaw tai na wa gaw tinang a prat hpe Madu Karai Kasang hte Sasana a matu prat htum hkra sak jaw ap nawng da sai lam hpe madun dan na matu shagum galeng nga na rai nga ai. Dai zawn galaw ai lam gaw Saradaw langai gun hpai ra na lit magam ni hpe dinghkrai a atsam hte sha n mai byin nga ai, dai re majaw Madu Karai Kasang a shaman chyeju San Pra ai ni garum ya na hte nawku hpung masha ni a garum hpyi ya na lam ni ra kadawn ai re majaw du sa ai hpung masha ni yawng Litany mahkawn hte akyu hpyi ya lawm ai rai nga ai.
Dai hpang Saradaw shatai ai grau ahkyak ai daw de du wa sai.
Saradaw kaba Cardinal gaw Saradaw tai na Jau a baw ntsa e Chyum Laika mara ya ai, Saradaw shatai ai akyu hpyi ga tsun ngut ai du hkra garum jau lahkawng dai Chyum Laika hpe shi a baw ntsa e lang da ya ai.
Lachyum gaw Saradaw tai na wa a ntsa e Chyoi Pra Ai Wenyi Karai Kasang yu hkrat wa nna Madu Yesu Hkristu a kup tsup ai Jau aya hpe Kanu Kahtawlik Nawku Hpung kata na Saradaw ni a lata kaw hkam la ai lam hpe madun ai lam rai nga ai. Bai, hkam la sai Saradaw prat hpe Karai Kasang a Ja Chyum Mungga hte dai hta rawng ai makam masham hkring htawng hpe makawp maga let dai Ja Chyum Mungga hpe hkaw tsun gat hkai na lit nga ai lam ni rai nga ai.
Dai hpang Saradaw tai na jau a baw ntsa hta sa du lawm ai Saradaw ni yawng lata mara akyu hpyi ya ai. Saradaw shatai akyu hpyi ga tsun ngut ai hpang Saradaw ningnan gaw Saradaw hpa-awn a man e hput di nna Saradaw kaba Cardinal gaw shi a Baw hta hkye hkrang la ai sau hpe chya ya ai.
Sau chya ya ai lachyum gaw Saradaw langai a magam bungli ni hpe kangka rai galaw gun hpai lu na matu Chyoi Pra |Ai Wenyi Karai Kasang a chyeju atsam hkam la ai lam rai nga ai.
Sau chya ya ngut ai hpang Kabu Gara Shiga Laika ap ya let dai Kabu Gara Shiga laika hpe hkaw tsun gat hkai na matu n gun jaw shatsam ai.
Dai hpang Saradaw langai a Sagu sari ni hpe langai hpang langai ap ya ai. Shawng nnan sadi dung ai lam a lachyum rai nga ai la chyawp hpe ap ya ai. Matut manoi Sasana ginwang shara hpe woi awn sa na lit magam nga ai lam hpe madi madun ai hku nna Saradaw gup daru hpe ap ya ai.
Bai sagu hpung masha ni hpe lakawn woi awn na lit nga ai lam hpe madi madun na matu Sagu Rem wa a Daw Hkrawng hpe ap ya nna lit shatsam ga tsun ai. Dai aten kaw nna Saradaw ningnan hpe lu la sai lam kabu gara tsun ndau ai. Nawku hpung masha ni yawng mung kabu gara ta hpawk jawm dum ai.
Dai hpang Saradaw ningnan hpe Saradaw kaba Cardinal kawn Tingnyeng de woi sa nna Tingnyeng hpe ap ya ai. Dai hpang sa du lawm ai Saradaw ni yawng Saradaw ningnan hpe kabu gara hkalum shakram ai lam hpe galaw ai.
Wa Saradaw ni hkap tau hkalum la ai lam galaw ngut ai hpang Myitkyina Sasana hta magam gun nga ai Wajau ni yawng hte nawku hpung a myitsu kanu kawa tai ai dat kasa ni Saradaw ningnan a shawng kaw ga sadi hkam la ai.
Dai hpang Missa Hkungga hpe Saradaw ningnan woi awn nna matut galaw mat wa ai hte Missa hkungga ngut ai hpang Wa Saradaw ningnan kaw nna Saradaw shatai poi hta sa du lawm ai hpung masha yawng hpe shaman ya nna Saradaw shatai poi hpe angwi apyaw sha galaw awng dang la lu sai rai nga ai.
