Daini na Ja Chyum Mungga hpe hti sum ru yu ai shaloi e, Nat kap ai Numsha ma a Kanu a kam sham myit hpe anhte na lu ga ai. Ndai ja chyum mungga hta na Nat kap ai ma a kanu gaw, tara maigan masha rai nga ai. Raitim mung Madu Yesu gaw Nat tsa dan hpe dang ai wa re hpe shi chye ai, kam sham ai. Shi a kasha hpe teng sha shamai ya lu ai re hpe mung kam sham ai. Dai majaw, Madu Yesu nga ai shara de, dai num jan du hkra sa ai. Shi a lagaw nhpang e hput di nna, kasha kaw na nat shaden kau ya na lam, Yesu kaw hpyi nem ai. Shiga madat la nga ai nu wa hpu nau ni, anhte yawng ndai tara mai gan masha ni ram pi kam sham myit nga nga ga ai kun? Myit yu ga.
Anhte ni tinang a kam sham myit hpe sum ru ding lik yu mai nga ai. Karai Kasang hpe kam sham ai nga tsun ai gaw loi la nga tim, ta tut hta e gaw, yak la nga ai. Dai majaw Karai Kasng shi ra sharawng ai gaw, N-gup a ga sha n rai, myit masin hkungga nan ra sharawng nga ai. Ndai tara maigan masha, Nat kap ai ma a kanu a kam sham myit gaw, yu mau na zawn rai nga ai. Madu Yesu shi a kam sham ai myit hte maren wa nu, Nat gaw na a shayi sha kaw na pru mat sai. Shing ngu tsun dat ai hte, dai num nta de du wa yang, kasha mai tsai taw nga ai hpe mu wu ai. Dai zawn kaba la ai kam sham myit nga hkra yawng shakut sa ga law.
