Myanmar Mungdan Kahtawlik Nawku Hpung Saradaw ni a Rapdaw ( CBCM ) ningbaw Wa saradaw kaba Cardinal Charles Bo kaw nna Wa Sarabyin Francis a matu alak mi akyu jawm hpyi garum ya na lam saw lajin ai ndau laika hpe ( 24 February 2025 ) ya shani shapraw dat nga ai.

Hkristu hta tsawra hkungga ai Wa Saradaw, Wa Jau, Mama, Brother ni hte tsawra ai kashu kasha nawku hpung masha ni Wa Sarabyin Francis gaw ya aten Roma mare na Gemelli tsi rung hta tsi tsi hkam la taw nga ai. Wa Sarabyin Francis machyi sawng nna nchyi nmu hkam sha taw nga ai ten hta Karai Kasang a tsawra matsan dum lama ai, shalan shabran ai hte shamai shatsai ya ai chyeju hkam la lu na matu Myanmar Mungdan hta nga ai Karai Kasang a kashu kasha ni hku nna yawng shang lawm akyu jawm hpyi garum na matu saw lajin garum hpyi dat nngai.

Wa Saradaw, Wa Jau, Mama, Brother ni, Karai magam gun ni yawng hte nawku hpung masha ni hku nna Wa Sarabyin lawan mai tsai hkam kaja wa na matu Missa Hkungga Nawng ya ai, Rosary hti akyu hpyi ya ai, Chyoi Pra Hkum sin akyu hpyi garum ya ai lam hta yawng myithkrum myitra rai alak mi akyu jawm hpyi garum ya ai lam hta yawng shang lawm na hpe aja awa saw lajin matsun dat nngai nga nna Wa Saradaw Kaba Cardinal Charles Bo kaw nna nawku hpung masha ni yawng hpe saw lajin garum hpyi dat nga ai.

Wa Sarabyin Francis gaw ya aten nsa sa lam hte seng ai Sinwawp bum ana a majaw Roma mare kaba na Gemelli tsi rung hta tsi tsi hkam la taw ai rai nga ai.

Wa Sarabyin a hkamja lam hte seng nna Mungkan ting na Kahtawlik nawku hpung masha ni myit tsang let akyu hpyi ya nga ma ai re.

Wa Sarabyin Francis a matu akyu hpyi garum ya na lam Cardinal Charles Bo a ndau laika