Daini na Ja Chyum Mungga hpe hti sum ru yu ai shaloi e, kaga masha hpe hkum jeyang ngu ai hte seng ai lam na lu ai. Nang gaw matsan dum chye ai wa re kun? Mara dat ya chye ai wa re kun? Jaw lu jaw sha chye ai wa re kun? Bai masha hpe lawan ladan tsun daw dan chye ai wa re kun? Dai ni na ja chyum mungga hta, Madu Yesu gaw, anhte a makam mashm hte maren sak hkrung nga sa na matu lam madun ya nga sai. Tsawra matsan dum lama ai myit hte tinang tsawra ai ni, jinghku jingyu ni a matu sha n-ga, tinang a hpyen wa hpe mung matsan dum lama ai lam madun dan ra ai. Kaga masha wa hpe hkum jeyang daw dan u. Nang mung jeyang daw dan ai hkrum na ra ai.
Bai kaga masha wa hpe layung madi yang, nang hpe layung masum bai madi na re hpe hkum malap u. Kaga wa hpe jeyang ai lam n galaw shi yang, tinang hkum hpe shawng jep sagawn dinglik yu u. Dai majaw lawan ladan tsun daw dan ai gaw, kaga masha wa hpe hkra machyi mat lu nga ai. Madu Yesu tsun ai gaw, kaga wa hpe mara dat ya ai rai yang, nanhte mung mara raw dat kau ya ai hkrum na teng sha re. Mara raw ya ai ngu ai gaw, kaga masha wa a matu n rai, tinang a matu sha re. Tinang lu ai sut gan ni mung kaja wa tinang madu ai n re. Anhte jahkring mi sha lu madu kyem da ai re ngu ai hpe n mai malap ai. Dai ni Madu Yesu sharin ya ai lam ni hpe sum ru let, ta tut hkan sa nga ga law.
