Daini na Ja Chyum Mungga hpe hti sum ru yu ai shaloi e, Sun shap galaw ai ni a ga shadawn hte seng ai lam ni na la lu na ga ai. Sun madu gaw shi a sabyi sun hpe amu galaw ai masha ni hpe kam ai majaw yu lajang shangun ai. Sabyi si di na ten hta mung shanhte lu gring ai hpe la na matu, shangun ma ni hpe lahkawng lang pyi sa dat ai. Raitim dai ni hpe gayet adup sat kau ai. Hpang jahtum e shi a kasha hpe dat dat ai shaloi pyi adup sat kau ai. Shingrai anhte yawng mung, ndai ga shadawn hte maren sun galaw ai shangun ma ni re. Sun madu gaw Karai Kasang rai nga ai.
Karai Kasang jaw ai kumhpa ni hta na langai gaw, anhte a makam masham re. Anhte kashin kamun hkam la ai kaw nna, ndai makam masham chyeju hpe lu la saga ai. Dai lu la sai makam masham hte sak hkrung nga sa ai. Bai kaga wa hpe bai garan gachyan ya ai hte ndai makam masham hpe gam garan ya na shi ra sharawng nga ai. Tinang lu la ai makam masham kum hpa hpe kaga wa hpe gam garan ya na lit nga ga ai. Shingrai Madu Yesu bai du sa wa ai shaloi e, anhte a makam masham apu asi ni ap jaw lu hkra makam masham hte maren sak hkrung nga sa ga law.
