Daini na Ja Chyum Mungga hpe hti sum ru yu ai shaloi e, Nazaret mare masha ni Yesu hpe n hkap la ai lam hpe na lu ga ai. Prophet Elia gaw manggang ana kap ai, Naman hpe shi a hkum hpe Jordan hka kaw sa kashin shatsai kau na matu tsun ai hpe Naman gaw sa kashin nna shamai shatsai lu ai hpe n kam ai. Ndai lam hpe Jeruslem mare masha ni mung n kam ma ai. Hpa majaw nga yang Madu Yesu gaw shanhte rau sha nga kaba wa ai majaw rai nga ai. Yesu gaw, Karai Kasang a shangun ma langai mi re ngu ai hpe shanhte n lu hkap la ma ai. Hkye la madu re ngu ai hpe mung n lu hkap la ma ai.
Dai majaw Yesu hpe mare shing gan de gawt shapraw kau ma ai. Dai ni na chyum laika hta, nyan hpaji hkum zup ai ni gaw Karai a shangun ma ni re hpe hkap la ma ai. Hpang jahtum e gaw, Naman mung prophet Elia tsun ai hpe hkan galaw nna, Jordan hka kaw sanit lang hka tsing shin kau ai hpang shi a mang gang mai tsai mat lu ai. Shing rai anhte ni mung, jam jau yak hkak hkrum wa yang, Karai Kasang hpe lamik kumla ni hte shamai shatsai ya na hpyi chye nga ga ai. Dai zawn lamik kumla n mu yang myit daw chye ga ai. Karai Kasang gaw lam shagu hta, lu galaw ya lu ai w re hpe kam sham nga na ahkyak la nga ai law.
