Daini na Ja Chyum Mungga hpe hti sum ru yu ai shaloi e, Yesu shangai wa na lam tau tsun da ai hpe na la lu ai. Karai Kasang a ra sharawng ai lam hpe hkan sa shakut ai hta, Nu Maria gaw hpa tsun shara n nga ai, kasi la ging ai Karai a hpang hkan ai ni kaw na kaja dik nan rai nga ai. Lamu kasa ga sa shana ai shaloi, Karai Kasang a yaw shada ai lam re hpe shi chye ai. Shi kam shut shara nre hpe shi chye ai majaw hkap la ai. Bai Madu Yesu mung, shinggyim masha ni mara kaw na lawt lu na matu, Kawa Karai Kasang a yaw shada ai hte maren shinggyim masha sa tai let, mungkan ga de yu sa wa ai. Madu Yesu a prat ting hta e mung kawa Karai Kasang a myit ra ai lam hpe hkap la hkan shatup sa ai rai nga ai.
Nu Maria mung Karai Kasang a myit hpe hkan shatup na matu, shi a myit ung ang ai lam hpe asan sha sawn sumru yu nna she hkap la ai re. Dai majaw lamu kasa ga sa shana ai shaloi, shi chye madat hkra sumru dinglik yu ai rai nga ai. Karai Kasang gaw mau hpa mahkra hpe dang di lu ai ngu ai hpe shi chye na mat ai. Karai Kasang n dangdi lu ai hpa n`nga ai. Dai majaw shi myit hkrum ai lam hpe myit masin mahkra hte mahtai jaw sai re. Ngai gaw Karai Kasang a shangun ma re nang Wa myit ra ai hte maren byin wa u ga ngu Karai Kasang a ra sharawng ai lam hpe hkap la dat sai rai nga ai. Shing rai anhte mung Karai Kasang myit ra ai hku hkawm sa lu hkra shakut sa nga ga law.
