Daini na Ja Chyum Mungga hpe hti sum ru yu ai shaloi e, kaba dik ai tara kanu a lam hpe na chye la lu ga ai. Anhte shawng nnan ahkyak da hkan sa ra ai tara gaw gara rai ta? Masha n kau mi gaw, laban n`htoi hte Misa hkungga nawng ya ai hte seng ai rit kawp tara ni hpe kaba dik ngu hkap la chye ma ai. Madu Yesu tsun ai gaw tara ni yawng hta na kaba dik tara gaw, “Na a madu Karai Kasang hpe na a hkum hkrang mahkra hte, na a myit masin mahkra hte na a n’gun atsam mahkra hte tsawra u” ngu ai tara nan re. Ndai tara gaw kaga tara ni yawng a ningpawt nan mung re. Ndai tara lam n lawm yang kaga ngam ai tara lam ni gaw kaman sha re.
No. 2 ngu na tara gaw, tinang hte ni htep ai wa hpe tinang a hkum hpe tsawra ai zawn manang wa hpe mung tsawra ra na tara rai nga ai. Ndai gaw Karai Kasang hpe tsawra ai zawn htingbu wa hpe mung tsawra ra na lam hpe tsun shadum ya ai re. Ndai tara lahkawng gaw matut manoi hkan sa ra ai hpe Madu Yesu tsun ai nan re. Shingrai madu hte ni htep ai wa hpe tsawra matsan dum ai gaw, anhte Karai Kasang hpe kade ram tsawra ai ngu ai hpe madun dan ai lam nan mung rai nga ai. Matut nna, anhte ta tut dai zawn sha sak hkrung nga pra sa ga law.
