Chyoi Pra ai Wenyi gaw, ya jang anhte a lapran de du sa nna Karai Kasang a tsaw ra ai hpe asan sha madun ya rit ga!
Hpunau ni e,
Daini gaw, Chyoi Pra ai Wenyi gaw anhte a salum ni hpe gara hku matut mahkai ai ngu ai hpe jawm sumru yu ga. Chyoi Pra ai Wenyi, anhte hta, bai, anhte hku nna lachyum pru akyu rawng ai akyu hpyi sumru ai amu hpe galaw na matu shi kaw akyu hpyi ga.
Karai Kasang anhte hpe shani shagu jaw ya ai kumhpa ni hta, Chyoi Pra ai Wenyi hku nna Shi Kawa hte rau kanawn mazum nga ai lam hta grau kaba ai kumhpa n nga sai. Dai majaw, Chyoi Pra ai Wenyi ya jang anhte kaw du sa nna Wa Karai a tsaw ra ai hpe laklai ai hku madun dan rit ga.
1 Korinhtu 6:19 hta “Nanhte a hkumhkrang gaw, nanhte Karai Kasang kaw na lu la ai hte, nanhte hta e rawng nga ai Chyoi Pra ai Wenyi a htingnu rai nga ai, nanhte gaw tinang a hkum hpe pyi up lu ai n rai” nga nna Kasa Pawlu sharin ya ai.
Hpring tsup, law htam ai asak hpe Chyoi Pra ai Wenyi hte salum rau pawng hpawm ai shaloi lu la ai. Wenyi gaw anhte a salum ni hpe shaga ai. Shi gaw, anhte a salum ni hpe tsaw ra ai, kabu gara ai, simsa ai, myit mada ai chyeju ni hte jahpring ya ai. Shi anhte a salum ni hta shanu nga ai.
Chyoi Pra ai Wenyi hte salum lapran rau pawng hpawm ai lam gaw, asak a hka-hpawk hpe len la ai hte bung nga ai. Hkye hkrang la ai lam a matu, anhte a kraw kata hta shangai hpang sai dai pawng hpawm ai lam hpe anhte grau dum hprang chye chyang wa ai gaw, tinang a hkum hpe Karai Kasang jaw ya mayu ai chyeju ni ma hkra hpe hkam la lu hkra, shara la ai hte bung nga ai.
Ndai Chyum Mungga daw hta, anhte Karai Kasang hte “rau jawm pawng, kanawn mazum ai” ngu ai hpe ya na tsang madang hta grau tsaw ai hku tsun nga ai.
Anhte gaw Madu yesu a sai the mari da hkrum saga ai. Madu Yesu wudang ntsa e si ai hte rau, nawku htingnu kata na nba grang gaw ntsa kaw nna ga du hkra, brang rai je mat ai nga nna Chyum Laika hta rawng nga ai.
Yesu rai n si ai ten hta gaw, Karai Kasang a hpung shingkang hpe nawku htingnu kata hta sha nga ai ngu nna chye madat ma ai.
Ya, Madu Yesu si ai hpang, shi a hkungga a majaw, anhte mahtang Karai Kasang shanu nga ai htingnu ni tai wa saga ai. Ya gaw, Hpan Wa Karai hte anhte, Chyoi Pra ai Wenyi hta rau pawng hpawm kanawn nga lu saga ai.
Ndai lam hpe 1 Korinhtu 6:17 hta tsun da ai: “Dai Madu hta manoi ai wa chyeawm gaw Wenyi langai sha rai nga ma ai.”
Roma 8:9 hta mung: “Nanhte hta e Karai Kasang a Wenyi rawng nga mit yang gaw, nanhte hkum shan myit hta e n rai, Wenyi hta e nan rawng nga mit dai” nga nna shangang shakang ya ai.
“Karai Kasang anhte a salum ni hta shanu nga ai” ngu ai gaw ga-shadawn tsun ai sha n rai nga ai. Nang, kam sham ai masha langai mi rai yang gaw, nang hpe masat dazik shakap da ya sai; Chyoi Pra ai Wenyi hte jahpring ya sai.
Nang galaw ra ai langai sha re ai lam gaw, dai mauhpa, shingra tara hta tawt jan ai hku Karai Kasang hte pawng hpawm kanawn mazum ai lam hpe grau chye madat hkra shakut na lam sha rai sai.
Chyoi Pra ai Wenyi gaw, Shi nang hte kade ni nga ai hpe madun mayu ai. Shi nang hta shanu nga ai lam hpe hpaw madun dan mayu nga ai. Nang hpe lam woi mayu ai, shaga mayu ai, jahpring ya mayu ai, myit dik ai lam jaw mayu ai, shamai shatsai ya mayu ai, gyit hkang hkrum ai kaw na shalawt dat mayu ai, atsam ningja the hpung shingkang jaw mayu ai. Na a salum a lawt lu ai hte shim lum lam hpe Shi hta mu tam shangun mayu ai. Na a kaja dik hte tsaw ra dik ai rau kanawn manang hte sara tai ya mayu nga ai.
Dai majaw, ya akyu hpyi ai shaloi, Karai Kasang nang hte kade daram ni htep nga ai hpe hkam sha lu hkra, bai, nang hkum-nan, shi Madu hte kade daram kahkin gumdin nga sai hpe madun ya rit ngu nna akyu hpyi ga.
- Chyoi Pra ai Wenyi hte salum a lam, Chyum mungga hta tsun ai hpe sumru u. Wenyi hte nang jawm pawng kanawn mazum nga sai madang hpe nhtang myit yu u.
1Korinhtu 6:19-20 hta: “Nanhte a hkumhkrang gaw, nanhte Karai Kasang kaw na lu la ai hte, nanhte hta e rawng nga ai Chyoi Pra ai Wenyi a htingnu rai nga ai, nanhte gaw tinang a hkum hpe pyi up lu ai n rai. Nanhte gaw jahpu manu daw nna mari da sai ni rai nga myit dai”.
- Chyoi Pra ai Wenyi kaw, shi nang hte ni htep nga ai lam hpe grau shadan shadawng ya na matu hpyi u. Na a salum hpe hpaw let, Karai Kasang a ni htep ai hpe hkam la u. Shi, na a salum hta kade daram ni htep nga ai hpe dum yu u.
- Karai Kasang shanu nga ai shangwang hta ban sa la u. Shi nang hpe madun dan ai shi kaja wa shanu nga ai lam hpe hkam la u.
Ya, nang rawt wa na re shaloi, daini tup nang galaw na lam ni hta Wenyi shang lawm nga u ga. Shi a ni htep ai hte tsaw ra ai hpe adum nga u. Karai Kasang hte rau rai nga na, shi hte hkrum na matu n shakut ra ai. Shi nang hte rau nga nga chyalu re.
Na a salum hpe sha, Karai Kasang a matu aten ladaw mi a hpang ladaw mi hpaw ya u. Shi nang hte hka taw nga zawn hkum nga. Grai tsan ai shara kaw nga taw ai zawn shi hpe hkum nawku.
Mungga a nhtoi man e hkawm nna, shi nang hte shanu nga ai a akyu hpe hpring tsup hkra hkam la u.
Na a sak hkrung prat gaw, Karai Kasang a atsam rawng ai, n hkoi n wai mat ai, agrin nga ai, shadang hpring myit dik lam hpe jaw ya lu ai, shi a ni htep shanu nga ai lam a majaw, mai kaja ai maga de galai shai wa nu ga law.
