Chyoi Pra Manga Ya ngu ai gaw, Yesu Hkristu wudang hta jen noi si hkam ai shani hpe masat dingsat poi galaw ai ninghtoi hpe ngu ai rai. Hkristan hpung masha ni gaw ndai ninghtoi hpe masat poi galaw nga ga ai. Madu Yesu gaw nni nkri kaba hkam nna, wudang hta si hkam let lup makoi hkrum ai hpang, hpung shingkang hte bai hkrung rawt nhtawm, Mungkan masha ni hpe hkye hkrang la sai hpe kamsham nga ga ai.
1. Chyum mungga hti ai.
(Yawhan a Laika hta na Yesu Hkristu Nni Nkri hkam ai hte si hkam ai lam hti dan ai)
2. Nawku Hpung hta ra kadawn lam ni a matu akyu hpyi ai.
3. Madu Yesu a Wudang hpe hkungga lara di ai.
4. Chyoi Pra Hkum hkam la ai …. Ngu ai lamang kaba ni lawm nga ai.
CHYUM GA DAW NI:-
Esaia 52:13- 53:1-12 ……. Madu a Shangun Ma gaw, masha law law a mara hpe gun kau nna, si du hkra Shi a asak hpe nawng kau ya ai. Madu chyawm gaw anhte mahkra a shut hpyit mara hpe shi a ntsa e mara da nu ai.
Hebre 4:14-16, 5:7-9 ……. Hkristu gaw myit shagrit shanem nna, madat hkam la ai majaw, yawng mayawng a matu hkye hkrang la ai a ningpawt tai was ai.
Yawhan 18:1-40, 19:1-4 ………. Yesu Hkristu a nni nkri kaba lam hte si hkam ai lam hpe hti dan ai.
HTINGRAI HTINGRAT HKUNGGA NAWNG YA AI
Anhte a Madu Yesu Hkristu wudang ntsa kaw jen noi si hkam nna, Kawa Karai Kasang hpang de shinggyim masha nga yawng nga pra a matu, htingrai htingrat hkungga nawng ya ai shani rai li ai. Hpa mara mung n lu, n kap ai Yesu hpe shinggyim ni jawm jeyang nhtawm, si ari jahkrat kau saga ai. Kaja wa tatut galaw ai gaw, Yuda ni a dugyi salang ni hte hkinjawng agyi ni gaw, Roma hpyen la ni a lata de ap ya kau ai rai mali ai. Shanhte gaw shinggyim masha yawng a gawng malai tai ai ni rai wa sai.
SHINGGYIM MASHA NI A N HKRU N KAJA LAM
Shinggyim masha ni a n hkru n kaja ai gaw, dik hkra rai sai hpe hpa hte shadawn tsun dan na lam n nga sai. Yesu Hkristu si hkam ai lam n nga yang, anhte yawng a matu hkye hkrang la lam mung n nga na sai. Dai majaw, nsam makoi ai hkrang hte anhte hkam la ai shaman chyeju (Blessing in disguise) nan rai nga ai.
YESU HKRISTU HKAM LA AI NNI NKRI KABA
Chyoi Pra ai Manga Ya hta, Yesu Hkristu nni nkri hte si hkam ai a majaw myit yawn nga ga ai. Yesu Hkristu hkam la ai nni nkri hpe myit aru yu magang, anhte a ntsa e nga ai Madu a tsawra myit gaw kade kaba nga ai hpe grau dum hprang wa magang rai nga ai. Anhte hpe tut nawng e shadum nga ai kumla gaw Yesu a “Wudang” rai nga li ai. Moi shawng de, mungdan a ntsa sadi run ai mara galaw ai ni, si ari jahkrat hkrum hkra na mara kaba tawt lai ai ni, lagut damya jaubu ni…ndai zawn re ni hpe shinggyim sari madang tsepkawp n nga ai hku si ari jaw yang, “wudang” hta jen noi sat ma ai htung lai nga malu ai. Madu Yesu hpa mara n nga ai wa, masha ni n ra sharawng dik ai wudang hta si hkam ai hpe hkam la sai.
MADU YESU HKAM LA AI NNI NKRI
Madu Yesu hkam ai nni nkri ngu ai shaloi, ndai lawnglam ni hpe myit aru yu yang grau chye na wa na hpe kam ai.
(1) Madu Yesu gaw hpyen ni a lata e rim hkrum ai.
(2) Yuda du salang ni hte Munggyi Pilatu a man e jeyang hkrum ai.
(3) Yuda Iskarut gaw Yesu hpe pup let hpyen ni kaw ap kau ai.
(4) Kasa Petru e masum lang nyet kau ai hkrum ai.
(5) Zingri zingrat kaba hkrum ai.
(6) Wudang hta jen noi si hkam ai….ndai lam kaba ni lawm nga ai.
HKYE HKRANG LA AI MASING
Karai Kasang a hkye hkrang la ai “yaw shada lam masing” hta ndai Chyoi Pra ai Manga Ya gaw ahkyak dik (climax) rai nga ai. Shinggyim masha ni shut mara a mayam prat kaw na lawt wa lu ai gaw, Yesu a nni nkri hte si hkam nna bai hkrung rawt ai majaw sha rai nga ai. Madu Yesu gaw anhte marai hkum shagu hpe wudang ntsa kaw nna ga shaga nga ai. Anhte mung tinang a myit masin lai shai let, shi Madu hpang hkan nang ra nga ga ai rai.
“Anhte gaw shut hpyit mara hta si mat wa nga ga ai rai nna, ding hpring ai hta e hkrung nga lu u ga, shi gaw, shi hkum hta nan, dai hpun ntsa e, anhte a shut hyit mara hpe gun kau nu ai: shi a nma a gawp hte e, anhte shamai shatsai ai hkrum ga ai.” (1Petru 2:24).
