Anhte gaw, anhte a sak-hkrung prat daw chyen n kau mi, nsin hta hkawm nga nna, kadai n chye ai hku, tinang hkrai garen gari rai nga chye ai; myit masin ni hta mung agung alau ni hkrum chye nga ga ai. Karai Kasang gaw, dai lam ni kaw nna shalawt la mayu nga ai.
Daini gaw, -nhtoi hta lawt lu ai hpe gara hku lu la mai ai ngu ai hpe jawm hka ja yu ga. Chyoi Pra ai Wenyi anhte hpe nhtoi de woi shang nna, anhte mung n hkrit n kang hkan nang lu hkra akyu hpyi ga. Chyum Mungga ni hta, nhtoi hte nsin hpe “Lawt lu ai lam hte shut hpyit mara”, “Karai Kasang lawm ai hte n lawm ai” ngu nna shabung da nga ai.
Madu Yesu mung shi hkum hpe shi “Nhtoi” hte man man shabung da nga ai.
Mahte 4:1 hta “Nhtoi kaba mu lu ma ai rai nna, Si ai mung hte de a shingnip kata hta dung nga ai ni kaw, Nhtoi dawng pru wa sai” nga nna tsun da nga ai.
Kasa Pawlu Ehpesu Hpung masha ni hpe shagun ai Laika 5:8 hta rai jang, anhte hpe mungkan a nhtoi hku nna bai shadawn da nga ai, “Nanhte, shawng e nsin mak rai nga myit ti mung, ya gaw, dai Madu hta e nhtoi rai nga myit dai”.
Yawhan 3:19-21 hta, anhte nhtoi de sit sa ai shaloi lawt lu ga ai nga nna Madu Yesu tsun ai: “Tara dara ai ngu ai mung, Nhtoi gaw mungkan ga de shang sai, rai timung, masha ni a arawn alai n shawp nga ma ai majaw, shanhte gaw nhtoi hta nsin hpe grau tsaw ma ai, dai gaw tara dara hkrum ai lam nan rai nga ai.
Kaning rai nme law, n shawp n kap ai amu galaw ai wa gaw, nhtoi hpe n dawng n wawm nga ai rai nna, tinang galaw ai amu majaw, daru sharin kau ai n hkrum n ga nga, nhtoi de n sit sa wa ai.
Tengman ai lam hkan galaw ai wa chyawm gaw, tinang galaw ai amu Karai Kasang hta shachyen nga ai gaw, dan pru u ga nga, dai nhtoi de sit wa wa ai”.
Shut hpyit mara a n kaja dik ai akyu gaw, Karai Kasang hte kaga masha ni kaw na makoi yen mat mayu ai “gaya ai” rai nga ai. Adam hte Eva gaw shawng na mara a majaw, Karai Kasang hpe gaya nna makoi mat ma ai. Daini na aten hta pyi, Madu Yesu anhte shut chye ai mara ni mahkra a manu matu, si hkam nna wa kau ya sai rai tim, anhte mahtang Karai Kasang kaw nna naw makoi nga ga ai.
Karai Kasang gaw, anhte lama ma hpe galaw shut kau jang, shi hpang de kagat wa na hpe la nga ai. Shi gaw “Myit malai nna bai wa ai kasha” ga shadawn hta na –myit malai lu nna bai nhtang wa ai kasha hpe lata lahkawng hpe ladawn let hkap ahpum la ai kawa rai nga ai; anhte hpa hpe galaw shut kau sai rai tim, shi a tsaw ra matsan dum ai lata yan gaw anhte a matu htani htana ladawn da nga ai.
Anhte hpe hkap ahpum tau la mayu ai, bai gaw gap ya mayu ai, shalawt ya mayu ai. Shi anhte hpe, anhte a gaya hkrum ai kaw na lawt shangun mayu ai, nhtoi de pru wa shangun mayu ai, shut hpyit mara a jahten shaza ai lam ni kaw na hkye la hkrum shangun mayu nga ai.
Myithtoi Esaiah 42:16 hta Karai Kasang tsun ai:
“Myi hten ai ni hpe, shanhte n chye ai lam hku ngai woi wa nna, shanhte n lai yu ai lam hta woi wa na ngai; shanhte a man na nsin hpe ngai nhtoi shatai nna, magaw ai lam hpe shading na we ai. Dai chyeju ngai galaw nna, shanhte hpe ngai kau da na n rai”.
Dai majaw, nang galaw shut kau ai lama mi mung, Karai Kasang nang hpe kau da hkra galaw lu na n rai. Na a mara ni a majaw shi n mau ai. Nang gaw dap hte ga-yun sha rai nga ai hpe shi chye ai. Raitim, shi nang hpe dai, na a gawng kya ai lam ni hte rau ahpum lashum da mayu nga ai. Nang hpe dai nsin a atsam kaw na mawai la mayu ai.
Dai majaw, nang shi kaw na n makoi nga ra ai. Nhtoi a kasha hku nna Karai Kasang a man de dinghpring ai myi hte du tsap ra ai (Ehpesu 5:8). Na a mara ni hpe raw dat kau ya hkrum nna, myit n-gun atsam nnan hte bai hpring wa nna, jet ai lawt lu lam hpe hkam sha lu na rai nga ai (Kasa 3:19-20).
Ya, anhte akyu hpyi ai shaloi, nang, nhtoi de dawng pru na matu gaya shangun ai lam hpe myit dum lu na matu aten la u. Karai Kasang a mara dat ya ai hte chyeju hpe hkam la nna “Lawt lu ai” hpe nang hkam la nit ga.
Akyu hpyi saga:
- Chyum Mungga hta “nhtoi hte nsin” a lam tsun da ai hpe bai myit dum ga. Na a hkum hpe nhtoi de shadang tup pru wa mayu hkra Karai Kasang a Mungga hte jasu la ga. Esaiah 42:16:
- Nang hta nhtoi de shapraw pru wa na lam hpa mi nga ai kun? Nang gaya na zawn nga ai hpa lam ni nga ai kun?
- Na hkum nang, nhtoi de pru wa rit. Nang gaya dum ai lam hte seng nna, Karai Kasang kaning nga hkam sha ai kun shi hpe san yu u. Shi kaw na mara dat ya ai hte shi a chyeju ni hpe hkam la nna, shi hta ban sa la u.
Hpungdim maga de:
1 Yawhan 1:7 hta
“Shi gaw dai nhtoi hta rawng nga ai hte maren, anhte mung dai nhtoi hta hkawm nga yang gaw, anhte langai hte langai kanawn mazum ai ni rai nga ga ai hte, shi a Kasha Yesu a asai gaw, anhte hta na mara nlang hte hpe jasan jaseng kau ya mi ai” nga nna tsun da ai.
Nang, shani tup Karai Kasang hte rau hkawm sa na matu myit hkut da ai rai yang, Shi nang hpe nhtoi de lam madun ya na ra ai. Madu Yesu a Sai hta na a kata-shinggan hpe kashin shatsai kau ya na atsam nga ai. Na a salum, shadang tup shi hte seng sai rai yang, nang “Lawt lu nit dai”. Daini, nang, na a Madu Karai Kasang a man e, ndut ndang, dinghpring ai hte hkawm sa nna “lawt wa lu nit ga law”.
