Karai Kasang a matsan dum lama ai gaw anhte hpe matsan dum chye na matu saw shaga nga ai .
Madu a nni nkri hkrum ai ndai Palm Sunday hpe San Petru shawa pa kaba hta, Wa Sarabyin Francis gaw, shadawn sharam n nga ai Madu a matsan dum lama ai lam hpe myit sumru yu na matu, “ndai Chyoi Pra ai bat magam laman e anhte a Wudang hpe gara hku gun hpai sa wa na ngu yaw shada tawn da ai”, ngu nna, tsun nhtawm nni nkri hkrum nga ai “anhte a grup yin yawng” na kaga masha ni hpe garum na matu nga nna saw shaga lai wa ai.
Wa Sarabyin Francis gaw shi a hkamja lam hte seng nna Masha law law rau hkrum shaga ai hta atsawm naw nmai shi ai majaw,shi a gawng malai hku nna Vice Dean of college na Cardinal rai nga ai Argentinian amyu masha Cardinal Leonardo Sandri kawn St. Peter shawa pa kaba hta galaw ai“Karai Kasang Tsawra myit hpe grau nna hkam sha shangun ai Kung La shamai poi Laban a lam hpe tsun shalai ya lai wa ai. Dai shara kaw Masha Mun Mali daram sa du lai wa ai hpe chye lu nga ai.
Cardinal Sandri gaw, Madu a tsin-yam tsindam, si hkam ai lam hte bai hkrung rawt ai lam hpe myit dum ai Chyoi Pra ai Bat magam na poi ni hpe galaw hpang ai Missa hkungga a matu Wa Sarabyin Francis a mungga hpe hti dan lai wa ai. Wa Sarabyin Francis gaw, kungla shaman laban shani hta, Yesu Yerusalem de shang wa ai shaloi, masha law law kabu gara hkap tau la ai hpe myit dum shangun nna , nhtoi gade nna ai hpang Madu Yesu hpe jahpoi asawng nna mara shagun ai hte Wudang hpai nna yawng hkyen ai hte jam jau ai lam de hkawm let dai mare kaw nna pru mat wa ai hpe bai myit dum na matu tsun lai wa ai.
Wa Sarabyin kawn dai shani hti ang ai kabu gara shiga hat na Roma ni rim la nna Madu Yesu a Wudang hpe hpai shangun hkrum ai Cyrene mung na Simon, gaja wa shi a myit hku na gaw nkam ai rai tim Karai Kasang a passion hta Personally hku nna shang lawm ra mat ai lam hpe anhte ni bai myit yu mai nga ai hpe tsun lai wa ai. “Madu Yesu a Wudang gaw Simon a Wudang bai rai mat ai, bai Simon shi a shamu shamawt ai hpe yu yang myit n gut ai zawn rai nga ai hpe matsing hpa hku nna tsun lai wa ai. Madu Yesu Calvary de Wudang hpai sa wa ai lam de shi garum na myit da ai lam n nga tim shi hpe shagyen nna hpai shangun hkrum ai gaw Karai Kasang a Passion hta Personally hku nna shang lawm ra mat ai lam hpe tsun lai wa ai. Simon hpe yu yang Madu Yesu hte shan a lapran hta hpa ga hkaw mi shaga ai lam nnga ai sha Wudang sha nga ai hpe mu chye lu nga ai.
Wa Sarabyin kawn shi Madu Yesu hpe tsawra myit hte karum mayu rai tim n rai tim Forced jaw na shangun hkrum ai rai tim anhte ni Cyrene mung masha Simon a Masin Salum hpe chye na ya ra ai hpe tsun lai wa ai. Karai Kasang a Salum gaw anhte a matu galoi mung hpaw da ya nga ai, shi a tsawra matsan dum ai myit (mercy) hpe shi a ningma ni hku anhte ni mu chye lu tim anhte shinggyim masha ni a salum gaw naw pat taw nga ai. Simon a myit hta pawt ai, matsan dum ai, chyena matsan dum ai myit (or) myit hpe jam jau jaw ai (anger, pity, compassion or annoyance) ni byin hkrum nga na re hpe Wa Sarabyin hku nna myit tau mai tim
gaja wa gaw anhte ni shi gara hku hkrum nga ai hpe nchye lu nga ai hpe tsun lai wa ai. Dai the maren sha anhte chye lu ai gaw anhte Mung kang ting na masha yawng a mara hpe shi langai a ntsa hta hkam la na matu Madu Yesu a Wudang hpe shi hpai karum lai wa ai hpe matut nna Wa Sarabyin tsun lai wa ai. Madu Yesu gaw anhte hpe tsawra ai majaw, Kawa Karai Kasang a ga hpe madat mara ai. Bai anhte hte rau shi jam jau hkam ai rai nga ai. Ndai zawn anhte n myit mada ai hte mauhpa lam hta Simon gaw hkye hkrang la ai labau a shara langai mi hku nna shang lawm lai wa ai majaw anhte ni gadai mung jasam nrai, mai gan masha mung nrai nga ai hpe tsun lai wa ai. Wa Sarabyin kawn Madu Yesu gaw anhte a prat ganing rai ai aten ladaw hta rai tim anhte marai hkum ngau shagu hpe sa jahkrum mai ai lam hpe Simon a Footsteps hku nna anhte hpe sharin ya nga ai, shi a lam hku anhte ni hkan sa mai nga ai hpe tsun shadum lai wa ai. “yawng hta anhte galaw ra ai lam gaw shi hkum nan asak jaw let hkawm lai wa ai anhte a matu san da ai shara shi nan lata la ai lam rai nga ai Calvary de hkawm na matu shadut ya ai La hte Num law law hte anhte a makau grup byin na nju ndawng ai myit ni hpe yu na sha ra nga ai hpe tsun lai wa ai. “Cyrene mung na Simon zawn rai nna Madu Yesu a Wudang hpe hpai let hkawm ai masha gade daram hpe anhte a prat hta mu lu nga ai kun? Anhte ni matsing nga ai kun? Majan tsin yam a majaw hkrat sum mat ai masha ni a myiman hta Karai Kasang hpe anhte mu lu nga ai kun? N gaja na sawng ai nrap ra ai lam ni hte hkrum ten anhte ni MaduYesu a Wudang gaman li la hku galoi n hpai nga ai, maga mi hku rai yang ndai ten gaw gaja wa anhte ni shi a Tsawra myit ga sadi hpe garan ya ra aten mung rai nga ai hpe tsun lai wa ai.”
Hpang jahtum hku nna Wa Sarabyin kawn tsin yam hkam sha ai ni hpe gara hku la ta Ladawn ya na, hkrat sum nga ai ni hpe sharawt ya na, myit daw nga ai ni hpe pawn ba la na, dai gaw Madu Yesu anhte hpe asan sha Madun dan lai wa ai Passion kaw na tsawra myit rai nga ai hpe tsun shapraw lai wa ai. Ndai Chyoi pra ai laban laman hta anhte sak hkrung ai prat hpe mada yu ga, “Karai Kasang a Mau hpa Tsawra myit” hpe chye lu na matu anhte ni tinang a Wudang hpai let
hkawm na hte anhte a makau garup byin hta jam jau hkrum nga ai ni yawng a Wudang hpe mung hpai let, bai anhte hkawm ai lam hta mu wa ai gadai hpe nchye tim mung Wudang hpai karum ai gaw Simon zawn anhte shada karum ai lam re ai hpe tsun lai wa ai.
