Daini na Ja Chyum Mungga hpe hti sum ru yu ai shaloi e, Sumsing lamu na yu wa ai asak muk a lam hpe mu hti lu ga ai. Ya daini anhte sak hkrung nga ai, ndai mungkan ga hta e, mai kaja ai lam hte n kaja ai magam ni, tara ai hte n tara ai nga nna, anhte shani shagu hkrum katut nga ga ai re. Shingrai, na a asak hkrung lam hta, ndai zawn n bung ai tara lam ni hta, nang gaw gara lam hpe mahtang lata la na kun. San pra ai St. Stehpen tsun ai gaw chyoi pra ai wenyi hte hpring zup ai ni gaw, nhkru n kaja ai laikyang aroi alai ni hpe n`gun n jaw ai, tsep kawp n lata ai nga ai re.
Dai ni na kabu gara shi ga hta, Madu Yesu tsun ai, ngai gaw asak muk rai nga nngai nga nna tsun da nga ai. Asak ngu ai hta, hkum hkrang asak, wenyi asak hte myit masin asak ngu ai nga ai. Madu Yesu hte kahkyin gumding let asak hkrung nga ai ni a matu, hkum zup ai a sak, hkum hkrang myit masin wenyi asak hkrung lu na ngu ai hpe Karai Kasang a mungga hta ga sadi jaw da sai re. Dai majaw shiga madat nu wa hpu nau ni e Yesu Madu gaw, anhte a Karai Kasang re ai hpe ya jang hkap la nga ga law.
